Փաստ ինֆո

Մալաթիայի նախկին թաղապետի  որդու՝  Սեդրակ Զատիկյանի սպանության պատվերը տալու մեջ մեղադրվող Ստեփան Հակոբյանի պաշտպան Երեմ Սարգսյանն այսօր միջնորդեց դատարանին  անպարտ ճանաչել ու արդարացնել իր պաշտպանյալին, վերացնել  նրա նկատմամբ ընտրված խափանման միջոց կալանավորումը   և ազատ արձակել դատարանի դահլիճից:

Երևանի Մալաթիա-Սեբաստիա վարչական շրջանների դատարանում, այսօր հրապարակած իր 72 թերթանոց պաշտպանական ճառում  Երեմ Սարգսյանն հայտարարեց, որ  գործով նախաքննության  ընթացքում ձեռք բերված ու  դատարանում հետազոտված ապացույցները  թույլ են տալիս հայտարարելու, որ գործը  ենթակա է  կարճման, իսկ  իր պաշտպանյալը՝  արդարացման:

Ըստ պաշտպանի, գործով նախաքննությունն անց է կացվել քրեադատավարական և այլ օրենքների բազմաթիվ էական խախտումներով, այդպիսի պայմաններում ձեռք բերված ապացույցները չեն կարող թույլատրելի ճանաչվել:  Մասնավորապես, ըստ պաշտպանի, գործով  նախաքննության ընթացքում՝  2007թ. սեպտեմբերի 1-ից  հետո (քրեական գործը հարուցվել է  2006թ.   հունիսի  22-ին)   մի  քանի տարվա ընթացքում որոշումներ չեն կայացվել նախաքննության ժամկետը երկարացնելու մասին,  մի շարք վկաների, ինչպես նաև  Ս.Զատիկյանի սպանության մայր  գործով դատապարտյալներ Արթուր Հովհաննիսյանի ու Լուսինե Ղևոնդյանի   ցուցմունքները ձեռք են բերվել  օրենքների կոպիտ խախտմամբ, բռնությունների ու հոգեբանական ճնշման գործադրմամբ: Խախտվել է նաև  Արթուր Հովհաննիսյանի  ու Լուսինե Ղևոնդյանի  պաշտպանության իրավունքը՝  պաշտպան Արթուր Ղարիբյանը  ներկայացել է քննիչի հրավերով, ինչի արդյունքում «ինքնախոստովանական ցուցմունքներ» են կորզվել: Փաստի առնչությամբ Փաստաբանների պալատում համապատասխան կարգապահական վարույթ է իրականացվել, որն էլ արձանագրել է խախտումը:

Ըստ Երեմ Սարգսյանի,  իր պաշտպանյալի ձերբակալությունը, կալանավարումը, որպես մեղադրյալ ներգրավելու որոշումները անօրինական են: Ս.Հակոբյանին  սկզբնապես մեղադրանք էր առաջադրվել  ՀՀ քրեական օրենսգրքի 235-րդ հոդվածի առաջին մասով՝  ռազմամթերք հանդիսացող փամփուշտներ ապօրինի ձեռք բերելը  և պահելը:  Քննությունը որևէ տվյալ չի ունեցել, որ ռազմամթերքը պատկանում է հենց  Ստեփան Հակոբյանին, որևէ ապացույց չի եղել նաև, որ դրանք ռազմամթերք են հանդիսանում: Այդ մասին դատաձգաբանական փորձաքննության պատճենը գործում  հայտնված «գրեթե վերջին փաստաթուղթն է»՝  ընդ որում, քննիչը որևէ կերպ չի հավաստել, թե  պատճենն  ինչպես է  հայտնվել գործում, որտե՞ղ է  բնօրինակը, որի հետ ծանոթանալու պաշտպանական կողմի միջնորդությունները ժամանակին անպատասխան են մնացել:  Ըստ պաշտպանի, անօրինական է նաև Ստեփան Հակոբյանի նկատմամբ հետախուզում հայտարարելու որոշումը՝ քննությունն որևէ  տվյալ չի ունեցել, որ Ստեփան Հակոբյանը թաքնվում, խուսափում է քննությունից կամ որ նրա գտնվելու վայրը հայտնի չէ:

Փաստաբանն արձանագրեց, որ  սպանության բուն գործով Մալաթիա-Սեբաստիա վարչական շրջանների դատարանի՝ դատավոր Տիգրան Պետրոսյանի նախագահությամբ կայացված դատավճռում  հաստատված է համարվել, որ սպանությունը կատարվել է Ստեփան Հակոբյանի ու Նարեկ Խաչատրյանի դրդմամբ՝  նյութական խրախուսանքի ակնկալիքի դիմաց:  Ուստի այդ դատավճռով, նրա գնահատմամբ, դատարանը խախտել է Ստեփան Հակոբյանի անմեղության կանխավարկածը:

Անօրինական են  նաև  հեռախոսային մի շարք համարների ելքային ու մուտքային զանգերի վերծանումները՝ դրանք ձեռք են բերվել առանց դատարանի համապատասխան որոշման: Բացի այդ, հայտնի է, որ Ստեփան Հակոբյանի հեռախոսից օգտվել են այլ անձինք ևս, ուստի վերծանումը չի կարող ապացուցել Ս.Հակոբյանի մեղքը:

Ե.Սարգսյանի կարծիքով, ոչ օբյեկտիվ, թերի, մակերեսային ու ձևական  է կատարվել նաև Հատուկ քննչական ծառայության կողմից  իրականացված քննությունը վկաների ու դատապարտյալի հանդեպ բռնությունների վերաբերյալ հայտարարությունների կապակցությամբ:  Քրեական գործ հարուցելը մերժելու որոշումը բողոքարկվել է  ՀՀ քրեական վերաքննիչ դատարան, ուստի այն դեռևս ուժի մեջ չի մտել:

Դեկտեմբերի 2-ին պաշտպանական ճառով հանդես կգա Ստեփան Հակոբյանը: