Փաստ ինֆո

Hraparak.am-ի տեղեկություններով այսօր դատական կարգադրիչների գործի շրջանակներում ձերբակալվել է Դատական դեպարտամենտի նախկին ղեկավար Միսակ Մարտիրոսյանը: Նույն տեղեկությունների համաձայն նա ձերբակալվել է վերջինիս տեղակալ, դատական կարգադրիչների ծառայության պետ Արմեն Մովսիսյանի ցուցմունքների հիման վրա:

«Փաստինֆո»-ի թղթակցի հարցմանն ի պատասխան  ոստիկանությունից հաստատեցին  Մ.Մովսիսյանի ձերբակալությունը։

Ինչպես ավելի վաղ «Փաստինֆո»-ն տեղեկացրել էր, պաշտոնատար անձի կողմից խոշոր չափի կաշառք ստանալու դեպքի առթիվ հարուցված և ՀՀ ոստիկանության քննչական գլխավոր վարչության Երևան քաղաքի քննչական վարչության ծանր հանցագործությունների քննության բաժնում քննվող քրեական գործով դեռեւս սեպտեմբերին «ՀՀ դատական դեպարտամենտե պետական կառավարչական հիմնարկի ղեկավար Միսակ Մարտիրոսյանը հարցաքննվել է որպես կասկածյալ:   Այն ժամանակ նա կասկածվում էր  աշխատանքի ընդունելու համար խոշոր չափերի կաշառք ստանալու մեջ:

Սեպտեմբերի 26-ին որոշում է կայացվել Մ. Մարտիրոսյանի պաշտոնավարությունը ժամանակավոր դադարեցնելու մասին: Հայաստանի Հանրապետության դատարանների նախագահների խորհուրդը սեպտեմբերի 27-ի նիստում որոշել է վերջինիս ազատել զբաղեցրած պաշտոնից:

Նշենք, որ  մեղադրանքներ են առաջադրվել նաեւ  Դատական կարգադրիչների ծառայության պետ Արմեն Մովսիսյանին։ Ընդ որում սեպտեմբերին դատարանը բավարարել էր նրա  նկատմամբ այսօր որպես խափանման միջոց կիրառելու մասին քննիչի միջնորդությունը և կալանքը որպես խափանման միջոց կիրառել 2 ամիս ժամկետով։
 
Մեղադրյալների թվում է նաեւ  Դատական կարգադրիչների ծառայության պետ Արմեն Մովսիսյանի  տեղակալ Գագիկ Խաչատրյանը, իսկ  մյուս տեղակալի`Գեղամ Գրիգորյանի նկատմամբ հայտարարվել է հետախուզում: Նշենք, որ Գ.Խաչատրյանի նկատմամբ ևս նախկինում որպես խափանման միջոց էր կիրառվել կալանքը, սակայն Ա.Մովսիսյանին ձերբակալելու օրը փոխվեց Գ.Խաչատրյանի խափանման միջոցը և նա անձնական երաշխավորությամբ ազատ արձակվեց։
 
Ըստ «Փաստինֆո»-ի ունեցած տեղեկատվության, դատական կարգադրիչների համակարգում աշխատավարձերի յուրացման դեպքեր են բացահայտվել, որն իր ընդգրկմամբ հավակնում է դառնալ սոցիալական չարաշահումների աղմկահարույց գործերից հետո երկրորդը: Քննությամբ բացահայտվել են մի քանի տասնյակ անձինք, ովքեր գրանցված են եղել, սակայն չեն ներկայացել աշխատանքի, իսկ նրանց աշխատավարձերը ստացել ու յուրացրել են նրանց պետերը: Ընդ որում, չարաշահումներն ընդգրկել են տարբեր ընդհանուր իրավասության դատարանների դատական կարգադրիչների կառույցներ, իսկ «կծիկը» գլորվում ու հասնում է մինչև դատական կարգադրիչների ծառայության կենտրոնական համակարգ:
 
Մեղադրանքներ են առաջադրվել նաև դատական կարգադրիչների ծառայության տարբեր ստորաբաժանումների ղեկավարներին: