Փաստ ինֆո

«Կոմպյուտերոն» ՍՊԸ-ն ընդդեմ «Համո Սահյան»-ի  անվան թիվ 70 դպրոցի գործով դատաքննությունն այսօր ավարտվեց։

Նշենք，Երևանի Էրեբունի և Նուբարաշեն վարչական շրջանների ընդհանուր իրավասության դատարանում տեղի ունեցած այսօրվա դատական նիստի ժամանակ դպրոցի ներկայիս տնօրեն Հերմինե Շափաղաթյանն ընդդիմացավ  լրատվամիջոցների տեսանկարահանմանը, թեեւ մինչ նախնական դատական նիստի սկսվելը  չէր առարկել և պատասխանել էր լրատվամիջոցների հարցերին: Արդյունքում，դատարանը պատասխանողի միջնորդությունը բավարարեց մասնակի և թույլատրեց տեսանկարահանել միայն հայցվորի խոսքը:

Պատասխանողը պնդեց նաև， որ դատական  նիստն անցկացվի իր բացակայությամբ և դատարանը փոխեց սահմանված ապացույցների հետազոտման կարգը` հնարավորություն տալով առաջինն արտահայտվել պատասխանողին, ապա` հայցվորին， ինչպես նաեւ թույլատրեց， որ  դրանից հետո պատասխանողը հեռանա， եթե նրա  ներկայության անհրաժեշտությունը չլինի։

Հայցվորը դպրոցի տնօրենից պահանջում է  բռնագանձել 3 175 100 ՀՀ դրամ գումար: Թիվ 70 դպրոցի տնօրեն Հերմինե Շափաղաթյանը «Կոմպյուտերոն» ՍՊԸ-ից գնել է 10-ը նոթբուք, համակարգիչները ստացել է անձամբ` պարտավորվելով 90 –օրյա ժամկետում վճարել գումարը։ Սակայն， հայցվորի ներկայացմամբ，նշված ժամկետում գումարը չի վճարվել, որից հետո կնքվել է լրացուցիչ համաձայնագիր` ժամկետը երկարացնելով մինչեւ հուլիս 31-ը։ Սահմանված երկրորդ ժամկետում եւս գումարը չի վճարվել եւ ներկայումս հայց ներկայացնելով դատարան հայցվորը պահանջում է նաև պատասխանողից բռնագանձել տույժեր, դատական ծախսերը, ինչպես նաև հայցվորի ներկայացուցիչ՝ փաստաբան Գևորգ Դավթյանի մատուցած ծառայությունների համար արդեն իսկ  վճարված 820 000 ՀՀ դրամը: Ինչ վերաբերում է  տույժերին, ապա  հայցվորի ներկայացուցիչը նշեց, որ այն քիչ են հաշվարկել` նկատի ունենալով， գործ ունեն դպրոցի հետ:

Դպրոցի տնօրենն， ի դեպ， չհրաժարվեց գումարից եւ դատարանում եւս պարտավորվեց  վճարել այն，սակայն տույժերի առումով  դատարանին խնդրեց գնալ  զիջումների:

Համո Սահյանի անվան դպրոցի տնօրենի պաշտոնը շուրջ երկու տարի զբաղեցնող  Հերմինե Շափաղաթյանը դպրոցը ստանդարտներից դուրս համարեց` նշելով, թե  անգամ իր ֆինանսական միջոցներով է փորձել դպրոցը «կարգի բերել, դուռ ու պատուհաններ է փոխել, ավել ու փոշի է գնել »: Ըստ նրա՝ իր մեղավորությունը կայանում է նրանում, որ ծանր  «լուծ» է վերցրել իր վրա:

Հարցին, թե ի վերջո որտեղ են գտնվում այդ նեթբուքերը,  դպրոցի տնօրենը այդպես էլ չպատասխանեց,  սակայն նշեց. «մեկ ամիս չի տևի， ամեն ինչ  կկարգավորենք»:

Երևանի ավագանու «Բարև Երևան» խմբակցության ղեկավար Անահիտ Բախշյանն այսօր մինչ դատարան գալը այցելել էր  վերը նշված դպրոց։ «Բավականին հին և խնդիրներով դպրոց է, դասասենյակ կար, որտեղ ապակի չկար և տնօրենը ով մտածում է դպրոցի համար 10-ը նեթբուք գնի՝ առաջին հերթին պետք է մտածեր ապակիների մասին»，- նշեց Ա.Բախշյանը: Ի դեպ， դպրոցում վերջինիս թույլ չեն տվել մտնել համակարգչային սենյակ:

Դպրոցի 9-րդ դասարանցիները Ա. Բախշյանին հավաստիացրել են, թե դպրոցում կա 3-4 համակարգիչ, բայց ոչ նեթբուքեր:

Անահիտ Բախշյանը համոզված է, որ եթե նա այսօր դպրոց գնացած չլիներ, ապա տնօրենը նիստի ընթացքում  չէր հայտարարի, որ նեթբուքերը դպրոցում չեն: Ըստ Բախշյանի՝ ակնհայտ խարդախության «հոտ» է գալիս: