Փաստ ինֆո

Ազգային ժողովի ՀՅԴ, «Բարգավաճ Հայաստան», «Հայ ազգային կոնգրես» և «Ժառանգություն» խմբակցությունները, ինչպես նաև անկախ պատգամավորներ Էդմոն Մարությանը և Խաչատուր Քոքոբելյանը նախաձեռնել են հրավիրել ԱԺ արտահերթ նիստ:

Նախատեսվում է առաջարկել մեկ տարով հետաձգել «Կուտակային կենսաթոշակների մասին»  օրենքով սահմանված  պարտադիր կուտակային բաղադրիչի գործարկումը, որը նախատեսված է 2014թ.-ի հունվարի 1-ից: Այդ ընթացքում առաջարկվում է իրականացնելո հանրային և մասնագիտական լայն քննարկումներ, նաև սահմանադրական բողոքարկումների միջոցով պարզել և հստակեցնել պարտադիր բաղադրիչի 10 տոկոսի պայմանի սահմանադրականությունը:

Այս մասին այսօրվա հայտարարությունների ժամին հայտնեց ՀՅԴ խմբակցության անդամ Արծվիկ Մինասյանը՝ ընդգծելով, որ բազմաթիվ կազմակերպություններ և բազմահազար քաղաքացիներ այս հարցով դիմել են ԱԺ բոլոր խմբակցություններին:

Ըստ Ա.Մինասյանի, ամենայն հավանականությամբ, նոյեմբերի  14-ին՝ ժամը 18.30-ին, ԱԺ արտահերթ նիստ հրավիրելու նպատակով վաղը կեսօրին կիրականացվի ստորագրահավաք:

Ընդդիմադիր պատգամավորը նաև կոչ արեց ՀՀԿ և «Օրինաց երկիր» կոալիցիոն խմբակցություններին՝  առաջարկելով  չտապալել նիստը, մասնակցել, գրանցվել, որպեսզի հնարավոր լինի իրականացնել «իսկապես արդյունավետ քննարկում»:

«Այս պահի դրությամբ  անգամ որևէ լիցենզավորված կազմակերպություն, որ պարտադիր կուտակային համակարգի շրջանակներում ֆոնդի կառավարում պետք է իրականացներ, չկա»,-հայտնեց Ա.Մինասյանը՝ հավելելով, որ Կենտրոնական բանկի նոյեմբերի 6-ի հայտարարությամբ նշվել է, որ ընդամենն երկու կազմակերպություն են դիմել լիցենզիայի համար: