Փաստ ինֆո

 

«Հարսնաքար» ռեստորանային համալիրի տարածքում 2012թ. հունիսի 17-ի բռնարարքի գործով մեղադրող Արմեն Մարուխյանն այսօր իր մեղադրական ճառում  հայտարարեց, որ անարժանահավատ են ամբաստանյալների՝ վերջերս տրված ցուցմունքները: Իրենց գործողությունները անհատականացնելու մասին ամբաստանյալներ Նորայր Հայրապետյանի, Արթուր Բաբլոյանի ու Գարիկ Մարգարյանի ցուցմունքներն, ըստ որոնց` նրանք առանձին-առանձին կռվի են բռնվել համապատասխանաբար տուժողներ Վահե Ավետյանի, Գարիկ Սողոմոնյանի ու Արտակ Բայադյանի հետ, ըստ մեղադրողի` պատասխանատվությունից խուսափելու  պաշտպանական տակտիկայի դրսևորումներ են:    

 

Մեղադրողը հայտարարեց նաև, որ պնդում է իր գործընկեր Արթուր Դավթյանի մեղադրական ճառը՝  հիմնավորումների ու  պատժաչափերի  միջնորդության առումով: Արթուր Դավթյանը միջնորդել էր բոլոր 6 ամբաստանյալներին դատապարտել 13-ական  տարվա ազատազրկման և  տուգանքի`  100 հազարական  դրամի չափով: 

 

Երևանի Ավան և Նոր Նորք վարչական շրջանների դատարանում՝ դատավոր Դավիթ Հարությունյանի նախագահությամբ, մեղադրողը հիմնավորված էր համարել ամբաստանյալներ Գարիկ Մարգարյանին, Արթուր Բաբլոյանին, Արման Խաչատրյանին, Արման Բաղդասարյանին, Դավիթ Ադամյանին ու Նորայր Հայրապետյանին առաջադրված մեղադրանքն, ըստ որի՝ նրանք միասնական դիտավորությամբ ծեծի են ենթարկել տուժողներ Վահե Ավետյանին, Արտակ Բայադյանին, Գարիկ Սողոմոնյանին, Արկադի Աղաջանյանին և Էդգար Նիկոյանին: Դրա հետևանքով Վահե Ավետյանի առողջությանը դիտավորությամբ պատճառվել է կյանքի համար վտանգավոր ծանր վնաս, որն անզգուշությամբ առաջացրել է նրա մահը, Արտակ Բայադյանի և Գարիկ Սողոմոնյանի առողջությանը` միջին ծանրության վնաս` առողջության տևական քայքայումով, իսկ Արկադի Աղաջանյանին և Էդգար Նիկոյանին ծեծի արդյունքում մարմնական վնասվածքներ չեն պատճառվել:

 

Մեղադրողը նշել էր, որ դատաքննության ընթացքում պաշտպանական կողմը ջանքեր չէր խնայում ներկայացնելու, թե տուժողները` ռազմական բժիշկներ Վահե Ավետյանը, Արտակ Բայադյանը, Գարիկ Սողոմոնյանը, նրանց ընկերներ Արկադի Աղաջանյանն ու  Էդգար Նիկոյանը գինովցած էին, ագրեսիվ ու լկտի պահվածք էին դրսևորում, սակայն գործի քննությամբ ձեռք բերված փաստական տվյալներով  ու ապացույցներով  դա չի հիմնավորվում: Ուստի՝ մեղադրողը արժանահավատ էր  գնահատել տուժողների ցուցմունքները:

     

Ըստ Ա.Դավթյանի, մասնավորապես, գործով հիմնավորված է, որ Վահե Ավետյանը գնացել է տուն և փոխել տաբատը, այսինքն՝ ենթարկվել է ռեստորանում սպորտային տաբատով չգտնվելու պահանջին: Վ.Ավետյանը մատուցողին ընդամենը հարցրել է՝ գուցե գլխարկով էլ չի կարելի գտնվել ռեստորանում, ինչը վերջինս ընդունել է որպես վիրավորանք, դուրս հրավիրել տուժողին ու ապտակել: Տուժողներից որևէ մեկը չի պատասխանել ամբաստանյալների ծեծին, չէին էլ կարող, ծեծկռտուքի եզրափակիչ հատվածում՝ ռեստորանի ավտոկայանատեղիում նրանք շրջապատված են եղել 15-20 ամրակազմ անվտանգության աշխատակիցներով, այդ  թվում՝ ամբաստանյալներով, ովքեր տեղատարափ հարվածներ էին հասցնում տուժողներին: Մեղադրողը նաև գտել էր, որ նախաքննության մարմինը ճիշտ  քրեաիրավական գնահատական է տվել հանցագործությանը, ըստ որի՝ ամբաստանյալներն ընդհանուր միասնական դիտավորությամբ ծեծել են տուժողներին՝ գիտակցելով  մեկը մյուսի գործողություններն ու լրացնելով միմյանց: Տուժողները շրջապատված էին 15-20 հոգու կողմից՝ փաստացիորեն զրկվելով փախչելու կամ պաշտպանվելու հնարավորությունից: 

 

Մեղադրողը միաժամանակ գտել էր, որ գործով հիմնավորվել է, որ ամբաստանյալները ոտնձգություն են կատարել տուժողների առողջության դեմ, ընդ որում՝ տուժողներից յուրաքանչուրին հավասարապես ծեծում էին այնքան ժամանակ մինչև նրանք բոլորը հայտնվեցին գետնին: Ա.Դավթյանը նշեց, որ տեղի ունեցածը սպանություն որակելու համար, ինչպես պահանջում են տուժող կողմի ներկայացուցիչները, գործում առկա չեն փաստական տվյալներ: 

 

Ըստ նրա՝ արժանահավատ չեն ու գործի տվյալներով չեն հիմնավորվում ամբաստանյալների պնդումները, թե իրենք փորձել են բաժանել կռվողներին կամ ուղղակի կանգնած են եղել. այդ դեպքում ինչու ամբաստանյալները որևէ բան չհայտնեցին  առնվազն 15 ծեծողներից  9-ի մասին:  

 

Նոյեմբերի  18-ի  դատական նիստում ճառերով հանդես կգա տուժող կողմը: