Փաստ ինֆո

 

ՀՀ ոստիկանության Սյունիքի մարզային վարչության Կապանի բաժնի պետի օպերատիվ գծով տեղակալ Գագիկ Դանիելյանին նախկինում առաջադրված մեղադրանքը  նոյեմբերի 5-ին փոփոխվել և նրան նոր մեղադրանք է առաջադրվել` ՀՀ քրեական օրենսգրքի 308-րդ հոդվածի 1-ին մասով՝  պաշտոնեական լիազորությունները չարաշահելը: 

 

«Փաստինֆո»-ի ունեցած տեղեկություններով`  նրան առաջադրված մեղադրանքը ավելի մեղմացվել է եւ կալանքից ազատ արձակվել։  Ըստ նոր մեղադրանքի`  Գ.Դանիելյանը，հանդիսանալով պետական պաշտոնատար անձ, ՀՀ ոստիկանության ՔԳՎ Սյունիքի մարզի քննչական բաժնի քննիչ Արման Ենգոյանի վարույթում քննվող քրեական գործով` խմբային շահերից և անձնական այլ շահագրգռվածությունից ելնելով՝ պաշտոնեական դիրքն օգտագործել է ծառայության շահերին հակառակ և չի կատարել ծառայողական պարտականությունները, որով  էական վնաս է պատճառել անձանց իրավունքներին և պետության օրինական շահերին: Կոնկրետ քրեական գործով չարաշահումը, ըստ վարույթն իրականացնող մարմնի, Դանիելյանը կատարել է քննիչի եւ գործով հսկողություն իրականացնող դատախազի հետ համագործակցաբար։

 

Նույն օրը Գագիկ Դանիելյանի նկատմամբ կիրառված խափանման միջոց կալանավորումը փոփոխվել է՝ չհեռանալու  ստորագրությամբ:  Մեղադրյալին մեղսագրվել է  միջին ծանրության հանցագործություն, իսկ դրա համար ՀՀ քրեական դատավարության օրենսգրքի 138-րդ հոդվածի 4-րդ մասի համաձայն`  քրեական գործով մինչդատական վարույթում մեղադրյալին կալանքի տակ պահելու ժամկետը,  հաշվի առնելով գործի առանձնակի բարդությունը, դատարանի կողմից կարող է երկարացվել` մինչև 6 ամիս ժամկետով: Նշենք, որ Գագիկ Դանիելյանի նկատմամբ որպես խափանման միջոց կալանավորումն ընտրվել է  2012թ. դեկտեմբերի 8-ին: Այս գրծով Սյունիքի դատախազի տեղակալը շարունակում է մնալ կալանքի տակ։

 

Նույն այդ օրը՝ 2012թ. դեկտեմբերի 8-ին, ՀՀ ոստիկանության Սյունիքի մարզային վարչության Կապանի բաժնի պետի օպերատիվ գծով տեղակալ Գագիկ Դանիելյանին մեղադրանք էր առաջադրվել ՀՀ քրեական օրենսգրքի 349-րդ հոդվածի 3-րդ մասի 1-ին կետով: Ըստ նախկին մեղադրանքի`  նա,  հանդիսանալով հետաքննություն կատարող անձ, ՀՀ ոստիկանության ՔԳՎ Սյունիքի մարզի քննչական բաժնի քննիչ Արման Ենգոյանի հետ, Քաջարան քաղաքի բնակիչ Հակոբ Թոսունյանի օժանդակությամբ,  առանձնապես ծանր հանցագործության` Գրիգոր Պապյանի սպանության վերաբերյալ քրեական գործով կեղծել է ապացույց: 

 

Մեղսագրվող հանցագործությունն ի հայտ էր եկել Գրիգոր Պապյանի սպանության, մի խումբ անձանց կողմից խուլիգանություն կատարելու և վկային սուտ ցուցմունք տալուն հարկադրելու դեպքերի առթիվ ` ՀՀ քրեական օրենսգրքի 104-րդ հոդվածի 1-ին մասով, 258-րդ հոդվածի 4-րդ մասով, 258-րդ հոդվածի 3-րդ մասի 1-ին կետով և 340-րդ հոդվածի 2-րդ մասով քննվող քրեական գործի նախաքննության ընթացքում: