Փաստ ինֆո

 Ժամը 17-ի մոտակայքում Ազատության հրապարակից դեպի Մաշտոց պողոտա տանող հատվածում ոստիկանների և հրապարակում «Ես սկսում եմ հեղափոխություն» ակցիա իրականացնող Շանթ Հարությունյանի կողմնակիցների միջև ծեծկռտուք և հրմշտոց է տեղի ունեցել: Ակցիայի մասնակիցները պայթեցրել են բենզինով լի շշեր:

Ոստիկանությունը դեպքի վայրից բերման է ենթարկել «Ցեղակրոն»  կուսակցության նախագահ Շանթ Հարությունյան և նրա համախոհներին:

«Փաստինֆո»-ի թղթակցի փոխանցմամբ,  Ազատության հրապարակը ոստիկանները օղակի մեջ են վերցրել, այնտեղից դուրս են հրավիրում քաղաքացիներին, Մաշտոցի պողոտան փակ է:  Կան վիրավոր  ոստիկաններ:   

Դեպքի առնչությամբ հայտարարությամբ հանդես է եկել նաև ոստիկանությունը: Հայտարության մեջ ասվում է.

«Արդեն քանի օր է` Շանթ Հարությունյանը բռնության կոչեր էր հնչեցնում Ազատության հրապարակում:

Ոստիկանությունը բազմիցս զգուշացրել էր դադարեցնել անխոհեմ պահվածքը և անօրինական գործողությունների մղելու կոչերը:

Այսօր ևս ոստիկանության ներկայացուցիչները Շանթ Հարությունյանին ու նրա կողմնակիցներին հորդորել են զերծ մնալ հակաիրավական վարքագիծ դրսևորելուց, սակայն նրանք չեն ենթարկվել ոստիկանների օրինական պահանջներին, ավելին` ժամը 17.10-ի սահմաններում, մահակներով ու ձողերով զինված, դուրս են եկել Ազատության հրապարակից` հայտարարելով, որ ցանկանում են երթ կատարել:

Ոստիկանության ներկայացուցիչները նրանց  կրկին հորդորել են չխախտել հասարակական կարգը և ազատել Մաշտոցի պողոտայի երթևեկելի հատվածը, սակայն նրանք գրպաններից հանել են քարերով լցոնված ինքնաշեն պայթուցիկներ և գետնին հարվածելով` սկսել են պայթեցնել:
Ոստիկանական վերակարգերին հաջողվել է կարգի հրավիրել օրինազանցներին և ազատել պողոտան:

Երկու տասնյակից ավելի օրինազանց  բերման են ենթարկվել ոստիկանության բաժին: Կան տուժած ոստիկաններ:

Կատարվում է դեպքի վայրի զննություն:

Տուժածների և ոստիկանություն բերման ենթարկվածների մասին լրացուցիչ կտեղեկացվի:
Ոստիկանությունը հայտարարում է, որ չի հանդուրժելու և ամենայն խստությամբ է արձագանքելու ցանկացած հակաիրավական գործողության, իսկ օրինազանցները կպատժվեն օրենքի ողջ խստությամբ»,- ասվում է հայտարարության մեջ: