Փաստ ինֆո

 

Քրեական հեղինակություն համարվող Ռաֆիկ Մադոյանի սպանության նախապատրաստության գործով մեղադրյալներից մեկի՝  Մարտուն Ծերունյանի պաշտպան Սամվել Ջաղինյանը  բաց նամակ է հղել ՀՀ գլխավոր դատախազ Գևորգ Կոստանյանին: 

 

«Հարգելի պարոն գլխավոր դատախազ, բաց նամակով դիմելով Ձեզ՝ հայցում եմ Ձեր բարձր աջակցությունը, խնդրում եմ ծանոթանալ Մ. Ծերունյանին առաջադրված մեղադրանքի էությանը: Համոզված եմ, որ այդ ժամանակ Ձեր համար ևս ակնհայտ կդառնա, որ Ծերունյանն որևէ հանցավոր արարք չի կատարել, նրան առաջադրվել է անհիմն և անարդարացի մեղադրանք, ուստի խնդրում եմ հանձնարարել իմ պաշտպանյալի նկատմամբ քրեական հետապնդումն դադարեցնել և նրա նկատմամբ ընտրված խափանման միջոցը վերացնել»,- նշվում է ՀՀ գլխավոր դատախազին ուղղված բաց նամակում:

 

ՀՀ ոստիկանության քննչական գլխավոր վարչության հատկապես կարևոր գործերի քննության վարչության վարույթում քննվող քրեական գործով 11.05.2013թ. Մարտին Ծերունյանը ձերբակալվել է, 14.05.2013թ. նրան մեղադրանք է առաջադրվել ՀՀ քրեական օրենսգրքի 35-104-րդ հոդվածի 2-րդ մասի 7-րդ և 8-րդ կետերով  և որպես խափանման միջոց է ընտրվել կալանավորումը:  Ըստ պաշտպանի, իր  պաշտպանյալի նկատմամբ կալանավորումը որպես խափանման միջոց կիրառվել և երկու անգամ երկարացվել  է  առանց որևէ փաստական հիմքի:  

 

Պաշտպանը գլխավոր դատախազի ուշադրությունն է հրավիրում այն հանգամանքի վրա, որ կալանքի մեջ գտնվելու վեց ամսվա ընթացքում իր պաշտպանյալի հետ  որևէ քննչական գործողություն չի իրականացվել, գործով քննիչը իր պաշտպանյալին հանդիպել է ընդամենը երեք անգամ, որից երկուսը ընտրված խափանման միջոցի ժամկետը երկարացնելու միջնորդությանը, իսկ մեկը` «ինչ-որ փորձաքննության եզրակացության»  ծանոթացնելու նպատակով: Այսպիսով, ըստ պաշտպանի,  խափանման միջոցը վերածվել է պատժի:

 

«Քրեական գործի նախաքննության ընթացքում բազմաթիվ միջնորդություններ և բողոքներ եմ ներկայացրել ինչպես նախաքննական մարմին, այնպես էլ դատախազություն և դատարաններ: Բոլոր դեպքերում ստացել եմ չպատճառաբանված ու անհիմն բացասական պատասխաններ: Այս ամիսների ընթացքում համոզված լինելով, որ իմ պաշտպանյալը իրեն մեղսագրված հանցավոր արարքի հետ որևէ կապ չունի,  սպասել ենք իրավապահ մարմինների կողմից խնդրի արդարացի լուծմանը, որը սակայն օր-օրի առավել անիրատեսական դառնալով հանգեցրել է հիասթափության, սպառել հավատը և բաց նամակով Ձեզ դիմելու առիթ հանդիսացել»,- նշում է պաշտպանը՝ վերստին ընդգծելով, որ Մարտին Ծերունյանին առաջադրվել է անհիմն մեղադրանք,  նրան որպես մեղադրյալ ներգրավելու որոշումը պատճառաբանված չէ և առհասարակ անհասկանալի է,   թե ինչ հանցավոր արարք է կատարելու մեջ է նա մեղադրվում:

 

«Փաստինֆո»-ն ավելի վաղ անդրադարձել էր հիշյալ գործին, որի շրջանակներում կալանավորվել և մեղադրանք է առաջադրվել 6 անձանց՝ Վարուժան Քարիմյանին, Սարգիս Զազյանին, Դավիթ Զիրոյանին, Արմեն Պետրոսյանին, Մարտին Ծերունյանին, Գևորգ Պետրոսյանին՝ ՀՀ քրեական օրենսգրքի 35-104-րդ հոդվածի 2-րդ մասի 7-րդ և 8-րդ կետերով՝ մի խումբ անձանց կամ կազմակերպված խմբի կողմից  շահադիտական դրդումներով սպանության նախապատրաստություն: Իսկ  Հովհաննես Ղամարյանի նկատմամբ հայտարարվել է հետախուզում: