Փաստ ինֆո

2014թ.-ի պետական բյուջեի նախագիծը ՀՀ Դատական դեպարտամենտի մասով քննարկվել է կառավարությունում: Գրեթե բոլոր հարցերի շուրջ ձեռք են բերվել համաձայնություններ: Սակայն երեք հարցեր, որոնք կառավարության կողմից ընդունվել են ի գիտություն, դատական համակարգի համար այսօր դեռևս շարունակում են մնալ ավելի քան անհրաժեշտություն: Դրանք վերաբերում են կապի ծառայություններին, այսինքն՝ փոստային առաքումներին, թարգմանչական ծառայություններին և դատական համակարգում առկա 19 ոչ բարվոք վիճակում գտնվող մեքենաները փոխելուն:

 

Այս մասին այսօր Ազգային ժողովի մշտական հանձնաժողովների համատեղ նիստում, 2014 թ.-ի պետական բյուջեի նախագծի քննարկման ժամանակ, հայտնեց ՀՀ Դատական դեպարտամենտի ղեկավարի ժամանակավոր պաշտոնակատար Կարեն Փոլադյանը:

 

Մասնավորապես, փոստային ծառայությունների մասով բյուջեով նախատեսվել է 226 մլն դրամ՝ բյուջետային հայտում նախատեսված 286 մլն դրամի փոխարեն: Ըստ նրա՝ անհրաժեշտ գումարը չհատկացվելու դեպքում ստիպված են լինելու օգտագործել պահուստային ֆոնդի միջոցները, մինչդեռ դրանց հաշվին նախատեսում էին լուծել առաջնահերթ խնդիրները, այդ թվում՝ կապված կապիտալ շինարարության, վերանորոգման հետ:

 

«Հայ ազգային կոնգրես» խմբակցության անդամ Գագիկ Ջհանգիրյանը փորձեց  ՀՀ Դատական դեպարտամենտի ղեկավարի ժամանակավոր պաշտոնակատարից պարզել, թե որքան է հաջողվել տնտեսել աշխատավարձերի մասով՝ հաշվի առնելով դատական կարգադրիչների աշխատավարձերի ֆոնդի գումարների յուրացման փաստի բացահայտումը: 

 

«Պարոն Ջհանգիրյան, ուզում եմ հասկանալ, թե հարցը այս համատեքստում որքանով է տեղավորվում: Աշխատավարձի ֆոնդը մյուս միջոցների համար չենք կարող ծախսել», - արձագանքեց Փոլադյանը: Պատգամավորը կրկնեց իր հարցը, հետաքրքրվելով, թե արդյոք բացահայտումից հետո այդ անձինք շարունակում են աշխատավարձ ստանալ, ինչին ի պատասխան Կ.Փոլադյանը հայտնեց, որ «այս պահին աշխատավարձի ֆոնդի խնայման թիվը» չի կարող ասել: Նա հայտնեց նաև, որ աշխատավարձի ֆոնդը մի փոքր ավելացել է: Պատճառն աշխատավարձերի բարձրացումն է»:

 

Այս երկխոսությանը ստիպված միջամտեց ԱԺ պետական-իրավական հարցերի մշտական հանձնաժողովի նախագահ Դավիթ Հարությունյանը. «Ես պատասխանեմ, երևի, այդ հարցին, որովհետև պաշտոնակատարը, չգիտեմ՝ երևի չի տիրապետում խնդրին: Իրականում խնդիրը հետևյալն է` շատ տարածքներում չէր հաջողվում բավարար թվով աշխատողներ գտնել: Եվ այդ հաստիքների սկզբունքորեն օգտագործման բուն նպատակը պետք է լիներ խրախուսել բոլոր նրանց, ովքեր աշխատում են կրկնակի  ծանրաբեռնվածությամբ: Այսինքն` հաստիքների պահանջարկն իրականում կա համակարգում: Այլ բան է, որ մարդիկ, որոնք կատարել են ենթադրյալ հանցագործությունը և գերշահագործել են տեղի մարդկանց` նրանց վրա դնելով շատ ավելի ծանր բեռ, քան նախատեսված է աշխատանքային պարտականություններով, չվարձատրելով համապատասխանաբար: Ես կարծում եմ՝ այստեղ տնտեսում քիչ հավանական է ունենանք, հակառակ դեպքում մենք կշարունակենք նույն գերշահագործումը»,-պարզաբանեց Դ.Հարությունյանը: