Փաստ ինֆո

 

ՖԻՖԱ-ն հրապարակել է մրցաշրջանի լավագույն ֆուտբոլիստին շնորհվող «Ոսկե գնդակ» մրցանակի այս տարվա թեկնածուների ընդլայնված անվանացանկը, որում ներառված չէ Հենրիկ Մխիթարյանի անունը:

 

Մինչդեռ, ամբողջական տարբերակին ծանոթանալու դեպքում կհամոզվեք, որ հայ կիսապաշտպանը միանգամայն արժանի էր այդ պատվին, քանզի այս տարի իրապես ավելի լավ տպավորություն է թողել, քան ներկայացված մի քանի այլ խաղացողներ, որոնք, թերևս, նախապատվություն են ստացել նախկին ծառայությունների համար:  

 

Ֆուտբոլի միջազգային ֆեդերացիայի պաշտոնական կայքում նշված են հետևյալ մարզիկների անունները՝ Լիոնել Մեսի, Նեյմար, Անդրես Ինյեստա, Խավի Էրնանդես, Ժերար Պիկե, Դանիել Ալվեշ (բոլորն էլ՝ «Բարսելոն», Իսպանիա), Քրիշտիանու Ռոնալդու, Գարեթ Բեյլ (երկուսն էլ՝ «Ռեալ», Իսպանիա), Մանուել Նոյեր, Դավիդ Ալաբա, Թոմաս Մյուլեր, Արիեն Ռոբեն, Բաստիան Շվայնշտայգեր, Ֆրանկ Ռիբերի, Մարիո Գյոտցե, Մարիո Մանջուկիչ (բոլորն էլ՝ «Բավարիա», Գերմանիա), Զլատան Իբրահիմովիչ, Էդիսոն Կավանի, Տիագո Սիլվա (երեքն էլ՝ «Պարի Սեն-Ժերմեն», Ֆրանսիա), Ռոբերտ Լևանդովսկի, Մարկո Ռոյս, Իլկայ Գյունդողան (երեքն էլ՝ «Բորուսիա», Գերմանիա), Ռոբին վան Պերսի, Ուեյն Ռունի (երկուսն էլ՝ «Մանչեսթեր Յունայթեդ», Անգլիա), Մեսութ Օզիլ («Արսենալ», Անգլիա), Լուիս Սուարես («Լիվերպուլ», Անգլիա), Դավիդ Լուիս («Չելսի», Անգլիա), Յայա Տուրե, Սերխիո Ագուերո («Մանչեսթեր Սիթի», Անգլիա), Ֆրեդ («Ֆլումինենսե», Բրազիլիա), Դիդիե Դրոգբա («Գալաթասարայ», Թուրքիա):

 

 Դեկտեմբերին ՖԻՖԱ-ն կհայտարարի եզրափակիչ քվեարկության ներկայացված երեք հիմնական թեկնածուների անունները, որոնք առավել շատ միավոր կստանան նախնական հարցման արդյունքներով:

 

Քվեարկությանը, հիշեցնենք, մասնակցում են ՖԻՖԱ-ին անդամակցող երկրների ազգային հավաքականների գլխավոր մարզիչները և ավագները, ինչպես նաև ֆուտբոլի միջազգային ֆեդերացիայի հրավիրած մամուլի ներկայացուցիչները: Դափնեկիրները կհայտարարվեն 2014 թվականի հունվարի 13-ին՝ Շվեյցարիայի Ցյուրիխ քաղաքում կայանալիք հանդիսավոր արարողության ժամանակ: 2009 թվականից, չորս տարի անընդմեջ, պատվավոր մրցանակին արժանացել է «Բարսելոնի» արգենտինացի հարձակվող Լիոնել Մեսին: