Փաստ ինֆո

Թերթի ուշադրության կենտրոնում է հոկտեմբերի 21-ին Կոտայքում տեղի ունեցած խոշոր ավտովթարի թեմային` հիշեցնելով, որ ժամը 21:20-ի սահմաններում Եղվարդ-Երևան ավտոճանապարհին BMW և «ՎԱԶ 2121»  մակնիշի ավտոմեքենաները բախվել էին, որի հետևանքով 7 հոգի մարմնական վնասվածքներով տեղափոխվել էր հիվանդանոց: Նրանց շարքում եղել էր նաև դերասան Վարդան Պետրոսյանը: «Վազ 2121» մակնիշի ավտոմեքենայի ուղևորներ, հորեղբոր որդիներ Էդգար և Էդուրդ Հակոբյանները մահացել էին, իսկ երեքի վիճակը ծանր է:

Ըստ աշտարակցիների` վթարի մեղավորը եղել է Վարդան Պետրոսյանը, ով, ըստ շրջանառվող լուրերի, ալկոհոլի ազդեցության տակ է եղել և մեծ արագությամբ է երթևեկել:

Զոհված տղաների քույրը ծանր վիճակում է. նա ողնաշարի կոտրվածք ունի, Էդգար Հակոբյանի հայրը ևս հիվանդանոցում է:

Սոցիալական ցանցերում ակտիվորեն քննարկվում է այս թեման. շատերը պահանջում են, որ մեղավորը պատժվի` օրենքի ողջ խստությամբ, եթե նույնիսկ մեղավորը Վարդան Պետրոսյանն է:

Թերթը նշում է, որ ոստիկանության` իրենց   աղբյուրը ևս հաստատել է տեղեկությունը, որ դերասանը գերազանցել է արագությունը և եղել է ալկոհոլի ազդեցության տակ: Մեքենան, պարզվել է, վարել է Վարդան Պետրոսյանը:

Լրատվամիջոցը տեղեկացնում է, որ զոհված երիտասարդների հարազատները հայտարարել են, որ եթե օրենքը չգործի, իրենք իրենց վրեժն են լուծելու դերասանից:

Թերթը, հղում անելով Shamshyan.com կայքին, այս ավտովթարի գործը ՀՀ գլխավոր դատախազ Գևորգ Կոստանյանի հանձնարարականով վերցվել է ՀՀ գլխավոր դատախազ Արամ Թամազյանի հսկողության տակ:

Հարուցվել է քրեական գործ` ՀՀ քրեական օրենսգրքի 242-րդ հոդվածի 3-րդ մասով, որով մեղավորը պատժվում է ազատազրկմամբ` 4-10 տարի ժամկետով:

Նշանակվել է ավտոտեխնիկական փորձաքննություն, որից հետո միայն պարզ կլինի դերասան Վարդան Պետրոսյանը գերազանցե՞լ է արագությունը, թե` ոչ:

Հոդվածն ամբողջությամբ կարդացեք «Չորրորդ Իշխանություն» օրաթերթի` 25.10.2013թ. համարում: