Փաստ ինֆո

ՀՀ կառավարությունն այսօր հաստատել է ավիացիայի ոլորտի զարգացմանն ուղղված ծրագիրը:

Հիշեցնենք, միակ ազգային փոխադրող համարվող «Արմավիայի» սնանկացումից հետո կառավարությունն անհրաժեշտ համարեց մշակել ավիացիայի ոլորտի զարգացման նոր մոտեցումներ:

Այդ նպատակով հուլիսի 18-ին կառավարությունում, վարչապետ Տիգրան Սարգսյանի մասնակցությամբ, ստորագրվեց համաձայնագիր Հայաստանի Ազգային մրցունակության հիմնադրամի, McKinsey & Company ընկերության և կառավարության միջև՝ մեր երկրում մրցունակ և շարունակական օդային փոխադրումների ապահովման ծրագրի մշակման շուրջ: 

Հուլիսի 22-ից արդեն հայ և ամերիկացի մասնագետները սկսեցին իրենց աշխատանքը: Եվ ահա, ամիսներ անց, այսօր կառավարությունն ի վերջո ընդունեց և հրապարակեց ներկայացված ծրագիրը:

Ինչպես գրված է ծրագրի նախաբանում. «Արդյունքում բացահայտվել է, որ Բաց երկնքի քաղաքականությունը կունենա ամենամեծ դրական ազդեցությունը տնտեսության, աշխատատեղերի ստեղծման, ուղևորների քանակի աճի և ավիափոխադրումների սակագնի իջեցման վրա»:

Ծրագրի իրականացման արդյունքում ակնկալվում է, որ ներկա իրավիճակի համեմատ մոտակա 3–4 տարիների ընթացքում 0.3-0.4 միլիարդ ԱՄՆ դոլարի չափով կաճի ՀՆԱ-ի ցուցանիշը, կբացվեն 18 000 մինչև 23 000 նոր աշխատատեղեր օդագնացության և զբոսաշրջության ոլորտներում, 20-25%-ով կաճի ուղևորների քանակ և շուրջ 10%-ով կնվազեն տոմսերի գները, ընդ որում որոշ ուղղություններով սպասվում է գների առավել մեծ նվազում` պայմանավորված մրցակցության ավելացմամբ:

Ինչ վերաբերում է տեղական փոխադրող ունենալու խնդրին, ապա ծրագրի հեղինակներն այս հարցի շուրջ հետևյալ դիտարկումն են անում. «Տեղական փոխադրողի ևս մեկ սնանկացումից խուսափելու համար անհրաժեշտ է ներդնել արտոնագրման արդար և թափանցիկ գործընթաց. արդյունքում շահագործման արտոնագրեր  պետք է տրամադրվեն միայն կենսունակ փոխադրողներին, որը կնպաստի տեղական փոխադրողների անվտանգ, հուսալի և կայուն զարգացմամբ աշխատանքին»:

Այդ նպատակով հստակ սահմանվել են այն չափորոշիչները, որոնց հիման վրա տեղական ընկերությունները կկարողական արտոնագիր ստանալ:

Եվ այսպես. հավակնորդի առանցքային աշխատակազմը պետք է ունենա գործարարության և մասնագիտական բավարար փորձ, ծառայության մատուցման վերաբերյալ վստահելի առաջարկներ (օրինակ` երթուղիների ցանցի, հաճախականությունների, սակագների, թռիչքի ժամանակ ուղևորներին առաջարկվող ապրանքների, բաշխման ուղիների համադրության), ինչպես նաևտեղեկատվություն համապատասխան ինքնաթիռների և ցամաքային ենթակառուցվածքների վերաբերյալ, բավարար սկզբնական կապիտալացում՝ ծածկելու առաջին 3 ամիսների սկզբնական գործարկման ծախսերը: «Օրինակ՝ 5 օդանավով (A320) ավիաընկերության համար սա կպահանջի մոտ 15-20 միլիոն ԱՄՆ դոլարի չափով մեկնարկային կապիտալ և գործունեության առաջին 3 ամիսների համար մոտ 30-45 միլիոն ԱՄՆ դոլարի չափով երաշխիքներ»,- ասված է ծրագրում: Բացի այդ կարևոր պայման է համարվելու նաև  սեփականատերերի կամ կառավարիչների կողմից անվտանգության խախտումներ և սպառողների նկատմամբ խաբեություններ նախկինում թույլ տված չլինելու հանգամանքը:

Ինչևէ, ծրագրի հեղինակները վստահեցնում են, որ Բաց երկնքի քաղաքականության առաջին արդյունքները տեսանելի կդառնան միայն 1-2 տարուց: