Փաստ ինֆո

Թերթն անդրադարձել է 15-ամյա Դավիթի սպանության թեմային: Ըստ տղայի հոր` այս սպանության մեջ շատ մութ կետեր կան: Տղայի հայրը` Հակոբ Հովակիմյանը, կասկածներ ունի, որ իր որդուն սպանել է 22-ամյա Կարեն Կուգորցևը:

Դեպքի մանրամասները պարզելու համար թղթակիցն այցելել է Դավիթ Հովակիմյանի բնակարան:

Ըստ տղայի հոր` դեպքի օրը Դավիթին զանգահարել է Ալավերդի քաղաքի թիմից մի տղա և օգնության կանչել: Վերջինս խաբել է մարզչին և չի ասել, որ գիշերօթիկի բակում կռիվ է, ու իրեն օգնության են կանչում:Վիճաբանությունն առաջնության հաղթանակի հետ որևէ առնչություն չի ունեցել:

«Իմ տվյալներով` ինչ որ մեկը փորձել է դանակով հարվածել որդուս ընկերոջը, որդիս էլ ցանկացել է դանակը վերցնել, բայց չի կարողացել: Արդյունքում ստացել է դանակի հարվածը»,- պատմել է Հակոբ Հովակիմյանը:

Վերջինիս պատմելով` իր որդուց բացի` առաջնության մասնակիցներից մեկը կացնի հարված է ստացել և տեղափոխվել հիվանդանոց: Ասում են, պատմել է Դավիթի հայրը, որ այդ կռվին կիրովականցիները կացնով են եկել և եղել են մոտ 20-30 հոգի: Ըստ նրա` ինքը չի կարող ասել, թե ով է դանակահարել տղային, քանի որ դեպքի վայրում 20-30 հոգի է եղել:

Թղթակցի հետ զրույցում տղայի ծնողները տեղեկացրել են, որ Դավիթը դանակի հարվածն ստացել է սրտից 11 սանտիմետր ներքև ու երբ տեղափոխել են հիվանդանոց, նրա գիտակցությունը տեղն է եղել, նա խոսել է մարզչի հետ:

Հակոբ  Հովակիմյաի խոսքով` որդին երկու ժամից ավել մնացել է այդպես` առանց բժշկական միջամտության, միայն դրենաժ է դրվել ու սպասել են: Եվ 2 ժամ հետո, ինչպես իր խոսքում նշել է Հ.Հովակիմյանը, տղայի սիրտը կանգ է առել:

«Եթե բժիշկը սկզբից բացեր, տեսներ` սիրտը ծակված է, թե`ոչ, ամեն ինչ կարող էր այլ լինել»:

Թղթակիցը զրուցել է նաև հիվանդանոցի վիրաբուժական բաժանմունքի վարիչ Վլադիմիր Ղուկասյանի հետ, ով ասել է, որ իրենք արել են ամեն ինչ` տղայի կյանքը փրկելու համար:

Հոդվածն ամբողջությամբ կարդացեք «Ժողովուրդ» օրաթերթի` 22.10.2013թ. համարում: