Փաստ ինֆո

«Պայքար Եվրոպայում ռասիզմի, այլատյացության և անհանդուրժողականության դեմ» թեմայով միջազգային համաժողովի աշխատանքներին մասնակցելու նպատակով Երևանում է ԵԽ գլխավոր քարտուղար Թորբյորն Յագլանդը: 

Համաժողովի բացմանն իր ելույթում եվրոպացի պաշտոնյան նշեց, որ թեև կարևոր է, որ  «պետությունները կամ կառավարությունները ինքնակարգավորման մեխանիզմներ կիրառեն, իրենց կեցվածքի, վարքի, վերաբերմունքի և իրենց հրապարակային արտահայտությունների նկատմամբ», սակայն պակաս կարևոր չէ նաև մամուլի և հատկապես հասարակության երիտասարդ հատվածի դերը:

Հատկանշական է, որ միջազգային համաժողովի մասնակիցների ուշադրության կենտրոնում են հատկապես սոցիալական ցանցերում և լրատամիջոցներում այլատյացության և անհանդուրժողականության դրսևորումները:

«Արշավն այսօր իրականացվում է երիտասարդների կողմից, որովհետև համացանցը նրանց սոցիալական կյանքի մասն է կազմում, և կարող է թիրախային միջոցառում դառնալ այս գործընթացում»,- նշեց Թորբյորն Յագլանդը:

«Մեր օրերում, երբ փոփոխվել են տարածության և ժամանակի ընկալումները, երբ երկրները դառնում են ավելի փոխկապակցված, երբ տեղեկատվությունը համացանցի միջոցով ակնթարթային արագությամբ հասանելի է դառնում միլինավոր մարդկանց համար, այս երևույթների դեմ պայքարն առավել քան կարևոր և արդիական է»,- իր խոսքում ընդգծեց նաև ՀՀ ԱԳ նախարար Էդվարդ Նալբանդյանը;

Համաժողովին մասնակցող ՀՀ ՄԻՊ Կարեն Անդրեասյանը, պատասխանելով «Փաստինֆո»-ի հարցին, թե անհադուրժողականության խնդիրն առավելապես հասարակությա՞ն, թե՞ իշխանությունների մեջ է, մասնավորապես ասաց. «Ես կարծում եմ իշխանություններն այսօր որեւէ հատուկ բացասական քայլեր չեն անում հանդուրժողականությունը վերացնելու, կամ ատելություն սերմանելու համար, բայց արդյո՞ք բավարար են այն քայլերը, որպեսզի իրենց պոզիտիվ պարտականությունը կատարեն, այսինքն քարոզեն այդ հանդուրժողականությունը, դեռ հենց այդ պոզիտիվ պարտականությունների մասով, կարծում եմ, թերացումներ ունի մեր իշխանությունը»:

«Պայքար Եվրոպայում ռասիզմի, այլատյացության և անհանդուրժողականության դեմ» թեմայով միջազգային համաժողովը Երևանում իր աշխատանքները կշարունակի նաև վաղը: Քննարկումների ուշադրության կենտրոնում են լինելու հատկապես քաղաքակա գործիչների հայտարարությունների, բանավեճերի, նրանց հրապարակային գործունեության և ելույթներում կիրառվող կոչերն ու գնահատականները, որոնք կարող են դիտվել որպես այլատյացության, ռասիզմի, անհանդուրժողականության դրսևորումներ:

 Ի դեպ, ինչպես իր ելույթում նշեց ԵԽ գլխավոր քարտուղար Թորբյորն Յագլանդը, Մարդու իրավունքների եվրոպական դատարանը հստակեցրել է կոնկրետ չափանիշներ, որոնք հստակ հատկորոշում են այլատյացության դրսևորումների և խոսքի ազատության սահմաննները: Նրա խոսքով, հատկանշվել են 70 արտահայտություններ, որոնք հրապարակային խոսքում կարող են դիտարկվել որպես վիրավորական և ընկնելվել իբրև ռասիզմի, այլատյացության, ագրեսիայի, նացիզմի և այլ դրսևորումներ: