Փաստ ինֆո

Էրեբունի և Նուբարաշեն վարչական   շրջանների ընդհանուր իրավասության դատարանում՝ նախագահությամբ Արտուշ Գաբրիելյանի, «Նուբարաշեն» ՔԿՀ-ի պետի օպերատիվ գծով տեղակալ Դավիթ Մուրադյանի  գործով այսօրվա  նիստում մեղադրողը հրապարակեց մեղադրանքը փոփոխելու մասին որոշումը:

Ըստ մեղադրող կողմի, ամբաստանյալ Դ. Մուրադյանը կատարել է  հանցագործություններ   ՀՀ   քրեական օրենսգրքի 311-րդ հոդվածի 4-րդ մասի 2-րդ կետով՝ երկու դրվագով: 

Դատախազը պարզաբանեց, որ մեղադրանքի փոփոխման անհրաժեշտություն առաջացել է այն պատճառով, որ դատաքննության ընթացքում հետազոտված ապացույցներն անհերքելիորեն վկայում են   ամբաստանյալ Դավիթ Մուրադյանի կողմից   ոչ թե  միասնական դիտավորությամբ 1 հանցագործություն,  այլ ՀՀ քրեական օրենսգրքի 311-րդ հոդվածի 4-րդ մասի 2-րդ կետով    2   առանձին հանցագործություններ կատարելու մասին:  

Այսպես, Դ. Մուրադյանը, 2011թ. դեկտեմբերի 1-ից մինչև 2013թ. փետրվարի 6-ը՝  աշխատելով որպես ՀՀ ԱՆ «Նուբարաշեն»  ՔԿՀ-ի պետի տեղակալ, օժտված լինելով քրեակատարողական հիմնարկի օպերատիվ և բժշկական սպասարկման բաժինները համակարգելու լիազորությամբ, 2012թ օգոստոսից մինչև դեկտեմբերն ընկած ժամանակահատվածում առանձնապես խոշոր չափերի կաշառք է պահանջել և ստացել նույն քրեակատարողական հիմնարկում պատիժ կրող,  միջին ծանրության հանցագործություններ կատարելու համար 5 տարի 6 ամիս ժամկետով ազատազրկման դատապարտված Ա. Հակոբյանից:  Կաշառքն, ըստ մեղադրողի,  ամբաստանյալը ստացել է  դատապարտյալի  օգտին իր լիազորությունների շրջանակներում գործողություններ  կատարելու համար,  մասնավորապես՝   առանց բավարար հիմքերի դատապարտյալին  ՔԿՀ-ի բուժմաս տեղափոխելու, տևական ժամանակ այնտեղ պահելու,  դատապարտյալին նրա  կնոջ հետ ոչ պլանային երկարատև և կարճատև տեսակցություններ տրամադրելուն նպաստելու, ինչպես նաև ծառայության գծով հովանավորչության, պատժախցի վերանորոգումը թույլատրելու,  այն կահավորելու և սահմանված կարգի խախտմամբ բջջային հեռախոս  պահելու և դրանից օգտվելու համար:  Արտակ Հակոբյանից, ըստ մեղադրողի, ամբաստանյալը  պահանջել և որպես կաշառք դատապարտյալից  անձամբ և նրա կնոջից՝    Հայաստան Հակոբյանից,  ստացել է  ընդհանուր առմամբ 1.631.320 ՀՀ դրամին համարժեք 4.000 ԱՄՆ դոլար, ինչպես նաև ստացել է 540.000 ՀՀ դրամ արժողության կահույք: 

Բացի այդ Դ. Մուրադյանը՝   ընդգրկված լինելով դատապարտյալների պայմանական վաղաժամկետ ազատման վարչական հանձնաժողովի կազմում, պատժի կրումից Արտակ Հակոբյանին վաղաժամկետ ազատմանն իր լիազորությունների  շրջանակում նպաստելու համար 2012թ. սեպտեմբերին իր աշխատասենյակում Ա. Հակոբյանից պահանջել և անձամբ ստացել է առանձնապես խոշոր չափերի 10 000 ԱՄՆ դոլար կաշառք:  Սակայն չկարողանալով լուծել Արտակ Հակոբյանի վաղաժամկետ ազատ արձակելու հարցը, ստացած գումարն իր աշխատասենյակում վերադարձրել է Հայաստան Հակոբյանին: 2012թ. դեկտեմբերին  նույն գործընթացը վերսկսելու համար    Ա. Հակոբյանից պահանջել և կրկին իր աշխատասենյակում  Հայաստան Հակոբյանից ստացել է  առանձնապես խոշոր չափերի 4000 ԱՄՆ դոլար կաշառք, սակայն վերջնականապես չկարողանալով լուծել այդ հարցը, նշված գումարը ևս ետ է վերադարձրել:

Պաշտպանական կողմը  ոչ իրավաչափ  գնահատեց մեղադրողի այս որոշումը և դատարանից  1 շաբաթ ժամանակ խնդրեց՝ գրավոր հիմքեր ներկայացնելու համար, դրանք կողմը կներկայացնի  հոկտեմբերի 25-ի դատական նիստում: