Փաստ ինֆո

«Հարսնաքար» ռեստորանային համալիրի տարածքում 2012թ.  հունիսի  17-ի բռնարարքի գործով այսօրվա նիստում մեղադրող  Արմեն Մարուխյանը հայտարարեց, որ ամբաստանյալներ Նորայր Հայրապետյանի, Արթուր Բաբլոյանի ու Գարիկ Մարգարյանի ցուցմունքների առնչությամբ այս պահին միջնորդություն չունի: Անցյալ նիստը հետաձգվել էր մեղադրողի  միջնորդությամբ՝ նա խնդրել էր ժամանակ տրամադրել, որպեսզի ինքը հայտնի իր դիրքորոշումը   հիշյալ ամբաստանյալների  ցուցմունքների առնչությամբ: 

Դատարանը գտավ, որ ամբաստանյալների հիշյալ ցուցմունքների առնչությամբ անհրաժեշտ է, որպեսզի գործով տուժողներ Արտակ Բայադյանը, Գարիկ Սողոմոնյանը,  Էդգար Նիկոյանը և Արկադի Աղաջանյանը լրացուցիչ հարցաքննվեն:Տուժող Վահե Ավետյանի իրավահաջորդի ու մյուս տուժողների ներկայացուցիչ Տիգրան Եգորյանը դատարանին հայտնեց, որ  Գարիկ Սողոմոնյանը հայտնել է իրեն, որ հերթապահության է, իսկ Արտակ Բայադյանը՝  վիրահատության, ուստի այսօր չեն կարող ներկայանալ դատարան:   Դատական նիստը հետաձգվեց մինչև հոկտեմբերի 21-ը:  

Հիշեցնենք, որ Երևանի Ավան և Նոր Նորք վարչական շրջանների դատարանում՝  դատավոր Դավիթ Հարությունյանի նախագահությամբ, գործով  դատաքննությունն  արդեն ավարտվել էր,  մեղադրող  Արթուր Դավթյանը հանդես էր եկել մեղադրական ճառով, որում հիմնավորված էր համարել միասնական դիտավորությամբ  տուժող Վահե Ավետյանին ու մյուս 4 տուժողներին բռնությունների ենթարկելու ամբաստանյալներին ներկայացված միասնական մեղադրանքը և միջնորդել էր ամբաստանյալներին դատապարտել 13-ական  տարվա ազատազրկման  ու 100-հազարական դրամի տուգանքի: Նախատեսվում էր, որ ճառով հանդես կգա տուժող կողմի  ներկայացուցիչ Տիգրան Եգորյանը, երբ անակնկալ կերպով  ամբաստանյալ  Նորայր Հայրապետյանը հայտարարեց, որ կամենում է լրացուցիչ ցուցմունք տալ: Դատարանը որոշում կայացրեց դատաքննությունը վերսկսելու մասին, իսկ  Նորայր Հայրապետյանը հայտարարեց, որ տուժող Վահե Ավետյանին ավտոկայանատեղիում  հարվածներ է հասցրել միայն ինքը: Նրան հետևեցին  ամբաստանյալներ Գարիկ Մարգարյանն ու Արթուր Բաբլոյանը.  առաջինը հայտարարեց, որ տուժող Արտակ Բայադյանին  ինքն է հարվածներ հասցրել, իսկ երկրորդը ստանձնեց տուժող Գարիկ Սողոմոնյանին հարվածներ հասցնելու պատասխանատվությունը: