Փաստ ինֆո

Թերթի թղթակիցը զրուցել է Պռոշյանի գյուղապետ Հրաչ Մուրադյանի սպանության գործով մեղադրյալ Արայիկ Պետրոսյանի պաշտպան Գիվի Հովհաննիսյանի հետ, ով իր խոսքում ասել է, որ հոկտեմբերի 14-ին Կենտրոն և Նորք-Մարաշ վարչական շրջանների ընդհանուր իրավասության դատարանը բավարարել է նախաքննական մարմնի միջնորդությունը` իր պաշտպանյալի կալանքը ևս մեկ ամսով երկարաձգելու վերաբերյալ:

Պաշտպանը նաև ասել է, որ անսպասելի էր կալանքը ևս մեկ ամսով երկարաձգելու նախաքննական մարմնի միջնորդությունը` հավելելով, որ որևէ հիմնավորում չի ներկայացվել:

«Իսկ կալանքը 15 օրով երկարաձգելը ինքնին խոսում է այն մասին, որ վարույթ իրականցնող մարմինն ինքն էլ է համոզված, որ իմ պաշտպանյալ Արայիկ Պետրոսյանն անմեղ է»,- ասել է փաստաբան Գիվի Հովհաննիսյանը:

Միաժամանակ պաշտպանը նշել է, որ փորձագետի եզրակացությունը ուսումնասիրելով` ևս հիմնավորվում է իր պաշտպանյալի անմեղությունը:

«Հիմնավորվում է նրանով, որ նախկին եզրակացության հիմք էր ընդունում անտիմոնի հայտնաբերումը, սակայն այս երկրորդ համալիր փորձաքննության եզրակացությամբ ապացուցվեց, որ այն անտիմոնը, որը հայտնաբերվել է, որևէ ձևով նման չէ կրակոցի հետևանքով առաջացողին»,- ասել է Գիվի Հովհաննիսյանը:

Պաշտպանն իր խոսքում նաև տեղեկացրել է, որ Արայիկ Պետրոսյանի եղբոր` Արտակ Պետրոսյանի  գործով նախաքննությունն ավարտվել է, և գործն ուղարկվել է Կոտայքի մարզի ընդհանուր իրավասության դատարան: Արտակ Պետրոսյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով: 

 Հոդվածն ամբողջությամբ կարդացեք «Հայկական Ժամանակ» օրաթերթի` 18.10.2013թ. համարում: