Փաստ ինֆո

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում` նախագահությամբ Մխիթար Պապոյանի, Սոցիալական ապահովության պետական ծառայության նախկին պետ Վազգեն Խաչիկյանի ու մյուսների գործով այսօրվա դատական նիստին հարցաքննվեց դատակոչված 8 վկա: 

Վկա Հովհաննես Գալստյանը  դստեր ամուսնու հոր մահվան տարեթիվը չէր հիշում, սակայն նշեց, որ երբ  դստեր սկեսրայրը մահացել է իր դուստրն  արդեն ամուսնալուծված է եղել: Վկան չէր հիշում նաև, թե երբ է ամուսնալուծվել իր դուստրը: Մեղադրողը նկատեց, որ վկան նախաքննության ընթացքում նշել է այդ մասին, վկան էլ պատասխանեց՝   «քննիչն  է ասել, թե երբ է ամուսնալուծվել աղջիկս»:

Վկա Միքայել Պետրոսյանը հայտնեց, որ իր տատը մեկնել է ԱՄՆ 1995թ.: Այս վկան ևս չէր հիշում, թե երբ է մահացել իր տատը՝  նշեց, որ 1998թ. է մահացել,  նախաքննական մարմնին տված ցուցմունքում, սակայն,  վկան նշել էր, որ տատը մահացել է 1999թ.:  

Վկա Եղիշե Դեմիճյանն հստակ պատասխան չուներ, թե ե՞րբ է մահացել իր քրոջ ամուսնու մայրը՝  սկզբում ասաց «չգիտեմ մահացել է,  թե ողջ է, բայց ամեն դեպքում մահացած կլինի»:  Սակայն վկան գիտեր, որ  նրա  անունը կա ընտրողների ցուցակներում: Դատարանի դիտարկմանը, թե ի վերջո վկան կհստակեցնի՞ այդ կինը մահացել է, թե ոչ՝  վկան ասաց, որ մահացել է, իսկ այդ մասին ճշտել է Լիբանանում բնակվող  քրոջ ամուսնուց: Վկան նաև նշեց, որ խնամին  ԱՄՆ-ը մեկնելուց հետո 4-5 տարի  անց վերադարձել է Հայաստան,  իր կենսաթոշակը ստացել ու ետ  վերադարձել: Դրանից հետ նրա  որդին է լիազորագրով ստացել կենսաթոշակը:

Վկա Լուսիա Մկրտչյանի 98-ամյա հայրն էլ 2002թ. բնակվում է ԱՄՆ-ում և մինչ այժմ չի եկել Հայաստան ու  չի ստացել իր կենսաթոշակը: Վկան դիմել է հոր կենսաթոշակը ստանալու համար,  սակայն մերժում է ստացել: Ոստիկանությունում վկային ստորագրված դիմում են ցույց տվել, ասելով որ իր հոր ստորագրությունն է,  վկան պնդեց, որ այդ ստորագրությունը իր հորը չի պատկանում:

Այսօր հարցաքննված վկաներից ոստիկանությանը հաջողվել էր բերման ենթարկել միայն 2-ին:  Եվս   24 վկայի վերաբերյալ  ոստիկանության տարբեր ստորաբաժանումներից գրություններ էին  ստացվել առ այն,  որ նրանց  հնարավոր չի եղել գտնել բնակության հասցեում: Մի քանիսի  վերաբերյալ  դատարանը կդիմի  սահմանային ծառայություններին՝ Հայաստանից նրանց ելքի կամ մուտքի տվյալներ ստանալու համար, իսկ մյուսների վերաբերյալ դատարանը նորից կհիշեցնի  բերման  ենթարկելու իր որոշման մասին:  

Նախաքննական մարմնի կողմից հարցաքննված մի քանի վկաների վերաբերյալ դատարանը սահմանային ծառայությունների օգնությամբ արդեն իսկ պարզել է, որ նրանք ներկայումս Հայաստանից բացակայում են:  

Հաջորդ դատական նիստը տեղի կունեն  2 շաբաթ անց՝ վկաների ներկայությունը նիստին ապահովելու նպատակով: