Փաստ ինֆո

Էրեբունի և Նուբարաշեն վարչական շրջանների ընդհանուր իրավասության դատարանում՝ նախագահությամբ Արտուշ Գաբրիելյանի, «Նուբարաշեն» ՔԿՀ-ի պետի օպերատիվ գծով տեղակալ Դավիթ Մուրադյանի  գործով այսօրվա  նիստում հարցաքննվեց «Նուբարաշեն» ՔԿՀ-ի նախկին ստուգող տեսուչ Ջիվան Օհանյանը: Վերջինս աշխատանքից ազատվել է սույն թվականի ապրիլին՝ վերը նշված քրեական գործի շրջանակներում:

Վկայի խոսքով՝ իրեն  աշխատանքից ազատել են դատապարտյալ Արտակ Հակոբյանի կնոջը չխուզարկելու և դատապարտյալի հետ կապի մեջ մտնելու պատճառներով:

Հիշեցնենք, որ դատապարտյալ Արտակ Հակոբյանի կինը դատարանում հարցաքննության ժամանակ նշել էր, որ իրեն չեն խուզարկել` անգամ  իր մոտ մեծ գումարի առկայության դեպքում, ինչի մասին տեղյակ է եղել Ջիվան Օհանյանը: Խոսքը գնում է այն 10 000 դոլարի մասին, որը դատապարտյալի կինը տվել է ամբաստանյալին՝ ամուսնուն վաղաժամկետ ազատ արձակվելու հարցը կարգավորելու համար: 

Նշվածի հետ կապված` վկան պարզաբանեց, որ տեսակցության եկած տղամարդկանց խուզարկում են տղամարդիկ, իսկ կանանց՝ կանայք, սակայն պնդեց, որ իր ներկայությամբ Արտակ Հակոբյանի կնոջը խուզարկել են: Նա նաև նշեց, որ դատապարտյալի կնոջը՝ Հայաստան Հակոբյանին, կարճատև տեսակցություններ են տրամադրվել միայն սահմանված կարգով, իսկ երկարատև տեսակցությունները տրամադրվել են դատապարտյալի դիմումի համաձայն՝ ՔԿՀ-ի պետի և տեղակալների ստորագրությամբ, և որ ինքը չէր կարող տեսակցություն չտրամադրել: 

Ինչ վերաբերում է գումարին, ապա վկան բացառեց, որ դատապարտյալի կինը գումարով կարող էր ներս մտնել:

Ջիվան Օհանյանը նաև նշեց, որ դատապարտյալ Արտակ Հակոբյանի կինն ամուսնուն տեսակցության է եկել հաճախակի, և երբ նա եկել է, վկան այդ մասին տեղեկացրել է Մուրադյանին: Մեղադրող դատախազը նկատեց, որ ոլորտը սպասարկում է սույն գործով որպես վկա հարցաքննված, «Նուբարաշեն» ՔԿՀ-ի անվտանգության ապահովման պետի տեղակալ Սմբատ Բուլղադարյանը, իսկ վկան Մուրադյանին է տեղյակ պահել այդ մասին:  Վկան ասվածը հիմնավորեց նրանով, որ  դատապարտյալը հետաքրքրություն էր ներկայացնում:

Ինչ վերաբերում է Արտակ Հակոբյանի և ամբաստանյալ Մուրադյանի միջև թշնամանքին, «Վարդաշեն» ՔԿՀ-ի օպերատիվ խմբի ղեկավար, վկա  Արման Սարգսյանը նշեց, որ Արտակ Հակոբյանի և Մուրադյանի առերեսման ժամանակ ինքը ներկա է եղել և որ ինքն է ուղեկցել Մուրադյանին, իսկ երբ քննիչը հարցրել է` թշնամանք կա միմյանց նկատմամբ, դատապարտյալը պատասխանել է` ոչ: Այնուհետև վիճաբանություն է եղել և Արտակ Հակոբյանը Մուրադյանին ասել է. «Ես քեզ հարգում էի, սակայն հիմա թշնամանք է առաջացել»:

«Արմենտել» ՓԲԸ-ից  դատարան ստացվել էր նաև Մուրադյանի և Արտակ Հակոբյանի ելքային և մուտքային հաղորդագրությունների մասին տեղեկություն,  որտեղ նշված էր դրանց քանակը և օրերը, սակայն բովանդակությունը չէր պահպանվել:

Ի դեպ, նշենք, որ պաշտպանական կողմի միջնորդությունը վերաբերում էր հենց հաղորդագրությունների բովանդակությանը, ինչը նկատեց նաև մեղադրող դատախազը` հավելելով, որ ոչ ոք չի կասկածել, որ Մուրադյանը և դատապարտյալ Արտակ Հակոբյանը կապի մեջ են  եղել:

Սակայն պաշտպանական կողմը շտապեց հայտարարություն անել և ասաց, որ ստացված տեղեկությունը հաստատում է Մուրադյանի ցուցմունքների արժանահավատությունը, որին ի պատասխան`  դատարանը հայտարարեց, թե որքանով են արժանահավատ ամբաստանյալի ցուցմունքները, կգնահատի դատարանը: 

Հաջորդ դատական նիստը տեղի կունենա հոկտեմբերի 18-ին: