Փաստ ինֆո

ՀՀ  Արմավիրի մարզի ընդհանուր իրավասության դատարանը՝  դատավոր Վահե Խալաթյանի նախագահությամբ, այսօր այսպես կոչված խոտի դեզի գործով ամբաստանյալ Արամ  Մուղալյանին մեղավոր է  ճանաչել  Հայաստանի Հանրապետության քրեական օրենսգրքի  258-րդ հոդվածի 1-ին մասով (խուլիգանություն)՝ երկու դրվագով, 258-րդ հոդվածի 3-րդ մասի 1-ին կետով (մի խումբ անձանց կամ կազմակերպված խմբի կողմից կատարված խուլիգանություն)՝ երկու դրվագով   և   34-185-րդ հոդվածի 2-րդ մասի 1-ին և 2-րդ կետերով՝  հրկիզման, պայթյունի կամ հանրավտանգ այլ եղանակով, խոշոր չափերի վնաս պատճառելով՝  գույքը դիտավորությամբ ոչնչացնելու կամ վնասելու փորձ: 

Արամ Մուղալյանը դատավճռով դատապարտվել է   ազատազրկման  2  տարի 6  ամիս ժամկետով:  Վերջերս ընդունված համաներման  որոշման կիրառմամբ նա ազատվել է պատժի կրումից, և նա   ազատ է  արձակվել դատական նիստի դահլիճում:                     

Ամբաստանյալ Ռոբերտ  Փիլոյանը  մեղավոր է  ճանաչվել Հայաստանի Հանրապետության քրեական օրենսգրքի 258-րդ հոդվածի 1-ին մասով՝ երկու դրվագով, 258-րդ հոդվածի 3-րդ մասի 1-ին կետով՝ երկու դրվագով և 34-185-րդ հոդվածի 2-րդ մասի 1-ին և 2-րդ կետերով և դատապարտվել ազատազրկման  2 տարի 6  ամիս ժամկետով: Ռոբերտ  Փիլոյանի նկատմամբ ևս կիրառվել է  համաներման մասին որոշումը, և նա  ազատվել է  նշանակված պատժից: Ռոբերտ Փիլոյանն ազատ  է  արձակվել դատական նիստի դահլիճում:                     

Ամբաստանյալ Գագիկ  Առաքելյանը  մեղավոր  է  ճանաչվել  Հայաստանի Հանրապետության քրեական օրենսգրքի 258-րդ հոդվածի 1-ին մասով և 34-185-րդ հոդվածի 2-րդ մասի 1-ին և 2-րդ կետերով և դատապարտվել  ազատազրկման   1  տարի 1   ամիս ժամկետով, որի կրումից նա ազատվել է համաներման որոշման կիրառմամբ: Գագիկ Առաքելյանն ազատ  է  արձակվել դատական նիստի դահլիճում:

Ամբաստանյալ Արթուր  Քլյանը մեղավոր  է  ճանաչվել Հայաստանի Հանրապետության քրեական օրենսգրքի 258-րդ հոդվածի 1-ին մասով և 258-րդ հոդվածի 3-րդ մասի 1-ին կետով և  նա դատապարտվել է  ազատազրկման   1  տարի 1 ամիս ժամկետով, որի կրումից նա ազատվել է համաներման որոշման կիրառմամբ:                   

Ըստ մեղադրանքի, Ա.Մուղալյանը իր ընկերներ Ռոբերտ Փիլոյանի և Արթուր Քլյանի հետ «իրենց առավելություններն ընդգծելու, հասարակության շրջանում վախ, խուճապ առաջացնելու և դրանով հասարակությանը հակադրվելու, զվարճանալու հանդուգն ցանկությամբ, դյուրավառ նյութի միջոցով հրկիզել են իրենց անծանոթ` Արմավիրի մարզի Նորապատ գյուղի բնակիչ Սիաբանդ Խուդոյանի տանը հարակից տարածքում գտնվող վերջինիս պատկանող խոտի դեզին կից ոչ պիտանի հարդը, դրանով խախտել են մարդկանց ամենօրյա կենսագործունեության՝ կենցաղի, հանգստի պայմանները, Ս.Խուդոյանի ընտանիքի անդամների ու հարևանների անդորրը, խուճապ ու տագնապ առաջացրել վերը նշված անձանց շրջանում. հրճվել դրանով և  ավտոմեքենայով դիմել են փախուստի։ 

Մեղադրանքի մեկ այլ դրվագով  Արամ Մուղալյանը Ռոբերտ Փիլոյանի և Արթուր Քլյանի հետ  դյուրավառ նյութի միջոցով հրկիզել են Սիաբանդ Խուդոյանին պատկանող խոտի դեզին հարակից տարածքը և դեզին մոտ կապված շանը` գույքային վնաս պատճառելով սեփականատիրոջը, դրանով խախտել են մարդկանց ամենօրյա կենսագործունեության՝ կենցաղի, հանգստի պայմանները, Ս.Խուդոյանի ընտանիքի անդամների ու հարևանների անդորրը, խուճապ ու տագնապ առաջացրել վերը նշված անձանց շրջանում, լուրջ անհանգստություն առաջացրել, հրճվել դրանով և դիմել փախուստի։ 

Մեղադրանքի երրորդ դրվագով Արամ Մուղալյանը և Ռոբերտ Փիլոյանը  Սիաբանդ  Խուդոյանին պատկանող տանը հարակից տարածքում դյուրավառ նյութի միջոցով հրկիզել են վերջինիս պատկանող 1.440.000 ՀՀ դրամ արժողության 1200 հակ պարունակող խոտի դեզի 1-ին շարքում դրված հակերից մեկը և ծխահարման արդյունքում վնասվել է 30 հակ` Ս.Խուդոյանին պատճառելով 36.000 ՀՀ դրամի նյութական վնաս։  

Ըստ մեղադրական եզրակացության,  ուրիշի խոշոր չափի գույքը հրկիզման եղանակով ոչնչացնելու դիտավորությամբ Արամ Մուղալյանը, Ռոբերտ Փիլոյանը և նրանց ընկեր Գագիկ Գրիշայի Առաքելյանը նախապես իրենց հետ վերցրել են բենզինով լցված 1 հատ 1 լիտր և 2 հատ 1,5 լիտր տարողության պոլիէթիլենային տարաներ ու գնացել են Արմավիրի մարզի Նորապատ գյուղի բնակիչ Սիաբանդ Խուդոյանի անասնագոմին հարակից տարածք և փորձել են այրել վերջինիս պատկանող խոշոր չափի` 1.440.000 ՀՀ դրամ արժողության, 1200 հատ հակ պարունակող խոտի դեզը, սակայն իրենց կամքից անկախ հանգամանքներում հանցագործությունն ավարտին չեն հասցրել, քանի որ խոտի դեզը իր նախկին տեղում չի եղել։ Վերջիններս   «իրենց հետ վերցրած բենզինը լցրել են խոտի դեզի նախկին տեղում և հրկիզել են` Ս.Խուդոյանի, նրա ընտանիքի անդամների ու հարևանների շրջանում առաջացնելով վախ, խուճապ և տագնապ ու դիմել փախուստի»։