Փաստ ինֆո

Թերթն անդրադարձել է ՀՀ դատախազությունում տեղի ունեցած կադրային փոփոխություններին` հիշեցնելով, որ երեկ ՀՀ գլխավոր դատախազի տեղակալ Մ.Սարգսյանը և ՀՀ գլխավոր դատախազության կոռուպցիոն և կազմակերպված հանցագործությունների գործերով վարչության պետ Կ.Փիլոյանն ազատվել են զբաղեցրած պաշտոնից:

Թղթակիցն այս կապակցությամբ զրուցել է Կորյուն Փիլոյանի հետ, ով իր խոսքում նշել է, որ իրեն ոչ ոք չի առաջարկել հեռանալ, ոչ ոք անգամ ակնարկ չի արել, որ ինքն է որոշել  և անգամ գլխավոր դատախազն անակնկալի է եկել` նրա` աշխատանքից հեռանալու մասին ցանկությունից :

Կ.Փիլոյանը միաժամանակ նշել է, որ որևէ խնդիր չկա, շատ բարձր տրամադրություն ունի:

Թղթակցի հարցին, թե ինչ կարծիքի է Փիլոյանն այն մտքի հետ, որ, ըստ աղբյուրների, Կոստանյանը չի ցանկանում աշխատել հին կադրերի հետ և որոշել է ազատվել նրանցից, պատասխանել է.  «Ես շատ վաղուց եմ ճանաչում Գևորգ Կոստանյանին, մենք իրար հետ առնչվել ենք, որևէ խնդիր երբևէ չենք ունեցել, հիմա առավել ևս չունենք»:  

Թղթակիցը զրուցել է նաև ՀՀ գլխավոր դատախազի նախկին տեղակալ Մնացական Սարգսյանի հետ, ով իր խոսքում նշել է, որ իր հեռանալու պատճառը դասախոսական աշխատանքն է` հավելելով, որ դասախոսական աշխատանքին կարոտել է և զբաղվելու է դրանով:

Այն հարցին, թե տեղեկություններ կան, որ նրա հեռանալը կապվում է Գ.Կոստանյանի հետ, Մ.Սարգսյանը պատասխանել է. «Ոչ մի դեպքում, Կոստանյանի հետ ամենամտերիմ հարաբերությունների մեջ եմ: Մենք փոխադարձ իրար վստահում ենք ու հարգում: 

Ավելի երիտասարդներն էլ թող գան, ավելի լավ աշխատեն»:

Թղթակիցը հարցրել է նաև, թե ճիշտ է արդյոք, որ գլխավոր դատախազն ուզում է հեռացնել Ա.Հովսեփյանի կադրերին, Մ.Սարգսյանը պատասխանել է.

«Ոչ պարոն Կոստանյանը երբեք այդպիսի մտադրություն չունի: Ինքը կադրերի 90 տոկոսին անձամբ է ճանաչում, այնպես որ այդ հերյուրանքները պետք է չէ լսել ու հավատալ, ես դա Ձեզ միանշանակ եմ ասում»:  

Հոդվածն ամբողջությամբ կարդացեք «Ժողովուրդ» օրաթերթի` 11.10.2013թ. համարում: