Փաստ ինֆո

Խոշտանգումների վերաբերյալ ոստիկանության Երևանի վարչության Կենտրոնականի բաժնի քրեական հետախուզության բաժանմունքի օպերլիազորներ Խաչիկ Բախբուդարյանի և Արտակ Բարսեղյանի դեմ գործով  այսօր կհրապարակվի  դատական ակտը: 

Երևանի Կենտրոն և Նորք-Մարաշ վարչական շրջանների դատարանը՝ դատավոր Մնացական Մարտիրոսյանի նախագահությամբ, քիչ առաջ հեռացավ խորհրդակցական սենյակ՝  դատական ակտ կայացնելու: Մինչ դատարանի խորհրդակցական սենյակ հեռանալը ամբաստանյալները հայտարարեցին, որ իրենք իրենց մեղավոր չեմ ճանաչում, որ իրենց գործողությունները իրավաչափ են եղել և որ  միանում են իրենց պաշտպան Լիպարիտ Սիմոնյանի պաշտպանական ճառում հնչած հիմնավորումներին:  

Ամբաստանյալների պաշտպաններ Լիպարիտ Սիմոնյանն ու Արայիկ Ալվանդյանը, պաշտպանական ճառում գտել էին, որ մեղադրանքն ապացուցված չէ, ամբաստանյալների գործողություններում բացակայում է հանցակազմը, ուստի պետք է կայացվի արդարացման դատավճիռ: Պաշտպան Սիմոնյանն ընդգծել էր, որ ոստիկանների ջանքերի շնորհիվ բացահայտվել է  հանցագործությունը, իսկ տուժող Ռ.Հովսեփյանը օրինական ուժի մեջ մտած դատավճռով մեղավոր է ճանաչվել գողություն կատարելու մեջ:  Ըստ պաշտպանական կողմի, ամբաստանյալները գործել են իրենց լիազորությունների շրջանակում, բռնություն չեն գործադրել,  պաշտոնեական կեղծիք չեն կատարել:

Մեղադրող  Գևորգ Երեմյանն իր մեղադրական ճառում  միջնորդել էր   Խաչիկ Բախբուդարյանին և Արտակ Բարսեղյանին դատապարտել 4-ական տարվա ազատազրկման՝ 2 տարով զրկելով  որոշակի պաշտոններ զբաղեցնելու իրավունքից: Մեղադրող Գ.Երեմյանը   նախաքննությամբ ձեռք բերված ու դատաքննությամբ հետազոտված ապացույցներով հիմնավորված էր համարել պաշտոնեական լիազորություններն անցնելու՝ մասնավորապես, խոշտանգումներ կատարելու, և պաշտոնեական կեղծիք կատարելու մեղադրանքը:  

Ի դեպ, այսօրվա դատական նիստին ներկայացել էր գործով նոր մեղադրողը՝ ՀՀ գլխավոր դատախազության դատախազ Վարազդատ Բադալյանը՝  դատախազության համակարգից  մեղադրող Գ.Երեմյանի ազատվելու պատճառով: