Փաստ ինֆո

«Հարսնաքար» ռեստորանային համալիրի ավտոկայանատեղիում ռազմական բժիշկ Վահե Ավետյանին միայն ամբաստանյալ Նորայր Հայրապետյանն է վնասվածքներ հասցրել՝  բռունցքով հարվածներ հասցնելու հետևանքով, մյուս ամբաստանյալները մեղավոր չեն: Այս մասին  Երևանի Ավան և Նոր Նորք վարչական շրջանների ընդհանուր իրավասության դատարանում՝  դատավոր Դավիթ Հարությունյանի նախագահությամբ,  «Հարսնաքար» ռեստորանային համալիրի տարածքում 2012թ. հունիսի  17-ի բռնարարքի գործով այսօրվա նիստում հայտարարեց ամբաստանյալ Նորայր Հայրապետյանը: Նա ընդգծեց, որ ոչ ոքի խփելու որևէ դիտավորություն չի ունեցել:  «Ինձ այդ վիճակին հասցրել են, որ ես հարվածել եմ»,- ասաց   Ն.Հայրապետյանը: Նա նշեց, որ Վ.Ավետյանն իրեն հարվածեց, ինքն էլ պատասխան  հարվածներ հասցրեց, բնական է, որ իր հարվածներն ավելու ուժեղ ստացվեցին, և Վահեն ընկավ գետնին:  

Ամբաստանյալը հայտարարեց, որ այլևս չի կարող ապրել ստի մեջ, չի ուզում, որ «անմեղ մարդիկ  պատասխան տան չարածի համար»:  «Ես չեմ իմացել, որ Վահե Ավետյանը այդպիսի վնասվածք է ստացել»,- ասաց  ամբաստանյալը: Ի պատասխան մեղադրող Արմեն Մարուխյանի հարցի, թե   ինչո՞ւ օգնություն ցույց չի  տվել վայր ընկած Վահե Ավետյանին, ամբաստանյալը պատասխանեց.  «Ես էլ էի վատ դրության մեջ, մի քանի րոպե հետո կմոտանայի, բայց իրենք արդեն հեռացել էին»:

Ամբաստանյալը հայտարարեց, որ  ծեծկռտուքը 35 վայրկյան է տևել, «կոտորած չի եղել ժամերով», ինչպես նշում են տուժողները՝ նրանք, ըստ ամբաստանյալի, «ոնց որ սովորեցրել էին,  այդպես էլ ասում էին»:  

Ցուցմունք տալու ցանկություն հայտնեց նաև ամբաստանյալ Գարիկ Մարգարյանը, ով դատաքննության ընթացքում հրաժարվել էր ցուցմունք տալ: Նա  հայտարարեց, որ տուժող Արտակ Բայադյանին ինքն է ծեծի ենթարկել: Նա հերքեց տուժողների այն պնդումը, թե  15-20 մարդ են եղել ծեծի ենթարկողները. «Մեր մեջ է եղել վեճը»:    Ամբաստանյալը հայտարարեց, որ իրեն մեղավոր է ճանաչում Ա.Բայադյանին ծեծի ենթարկելու համար: 

Ցայժմ լռություն պահպանած ամբաստանյալ Արթուր Բաբլոյանը նույնպես խախտեց լռությունը: Ամբաստանյալն «ստանձնեց» տուժող Գարիկ Սողոմոնյանին ծեծի ենթարկելու պատասխանատվությունը: «Ես էլ եմ խփել, Գարիկ Սողոմոնյանն  էլ»,- ասաց նա:

Աշխատանքային օրվա ավարտի պատճառով դատական նիստը հետաձգվեց մինչև հոկտեմբերի 11-ը: 

Նշենք, որ դատարանն արդեն ավարտել էր դատաքննությունը, սկսվել էր դատական վիճաբանությունների   փուլը, երբ Նորայր Հայրապետյանը հայտարարեց, որ ցանկանում է Վահե Ավետյանին վնասվածքներ հասցնելու վերաբերյալ լրացուցիչ ցուցմունք տալ:  Դատարանը բավարարեց  միջնորդությունը և որոշում կայացրեց դատաքննությունը վերսկսելու մասին: