Փաստ ինֆո

Այսօր ՀՀ Փաստաբանների պալատի նախագահի  լիազորությունները ստանձնեց փաստաբանական համայնքի նորընտիր ղեկավար  Արա Զոհրաբյանը: Նա ընտրվել էր ՓՊ նախագահ սեպտեմբերի 14-ին անցկացված ընտրությունների արդյուքնում՝ ստանալով  913  քվեարկության մասնակիցներից  713-ի վստահության քվեն: 

ՀՀ փաստաբանների պալատի առաջին նախագահ Ռուբեն Սահակյանը շնորհակալություն հայտնեց իր գործընկերներին 8 տարիների ընթացքում համատեղ աշխատանքի համար:

ՓՊ առաջին նախագահը շնորհակալություն հայտնեց նաև միջազգային կառույցներին՝  USAID-ին, ABA-ի,  Եվրամիության, Եվրախորհրդի և ԵԱՀԿ-ի հայաստանյան ներկայացուցչություններին, ինչպես նաև Սահմանադրական դատարանին, Արդարադատության նախարարության աշխատակիցներին, ՀՀ Ոստիկանապետ Վլադիմիր Գասպարյանին համագործակցության համար՝ կարևորելով մասնավորապես ոստիկանության և փաստաբանների պալատի միջև կնքված հուշագիրը:

Նա շնորհակալություն հայտնեց նաև ՓՊ նախագահի ընտրություններին մասնակցած փաստաբաններին՝ ընդգծելով, որ մասնակցության տոկոսը բավականին բարձր է եղել՝ 1370 արտոնագիր ունեցող փաստաբաններից մասնակցել է նրանց 67 տոկոսը: Արդյունքում՝ ընտրությունները հասարակության կողմից բավականին բարձր գնահատականի են արժանացել: 

Ռ. Սահակյանը, շնորհավորելով ՓՊ նախագահի պաշտոնում իրեն հաջորդող Ա Զոհրաբյանին, համոզմունք հայտնեց, որ նրա գլխավորությամբ «միայն ու միայն դրական փոփոխություններ են լինելու, որոնք կզգանք առաջիկա ամիսների ընթացքում»: Ռ. Սահակյանը հույս հայտնեց նաև, որ  բոլոր փաստաբանները՝ Ա. Զոհրաբյանի գլխավորությամբ, ջանք ու եռանդ կգործադրեն էլ ավելի բարձրացնելու փաստաբանության և փաստաբանների հեղինակությունը. «ես անձամբ այդպես եմ վարվելու»: 

Ռ. Սահակյանը նշեց, որ խնդիրներ շատ կան, որոնք պետք է լուծվեն և հույս հայտնեց, որ կառավաությունը կաջակցի այդ խնդիրների լուծմանը: Ռ. Սահակյանը գոհունակություն հայտնեց, որ հետխորհրդային տարածքում Հայաստանը միակ երկիրն է, որտեղ ստեղծվեց Փաստաբանական դպրոց և հոկտեմբերի 6-ին Դպրոցի առաջին շրջանավարտները կստանան իրենց արտոնագրերը: «Դպրոցը կայացման ճանապարհին է ու դեռ կկայանա»,-ասաց Ռ. Սահակյանը հավելելով՝ հանգիստ խղճով եմ թողնում ՓՊ նախագահի պաշտոնը և ուրախությամբ հանձնում այն Պալատի նորընտիր նախագահին:

Մինչ Արա Զոհրաբյանի կողմից լիազորությունները ստանձնելը հնչեց փաստաբանների օրհներգը և դահլիճ բերվեց ՓՊ  նախագահի խորհրդանիշը՝ Մխիթար Գոշի «Գիրք դատաստանի»-ն:

Արա Զոհրաբյանը՝ ստանձնելով   իր լիազորությունները, շնորհակալություն հայտնեց  ՓՊ նախագահի ընտրություններին մասնակցած բոլոր փաստաբաններին և վերահաստատեց նախընտրական փուլում հայտնած իր դիրքորոշումն այն մասին, որ իր նախընտրական ծրագիրը պայմանագիր է իր և իր ընտրողի միջև: Նա միաժամանակ կոչ արեց ընտրողներին լինել պահանջատեր, ինքն իր կողմից խոստացավ բարձր պահել ՓՊ-ի նախագահի պատիվը, ջանք ու եռանդ ներդնել ապահովելով՝ փաստաբանության ինստիտուտի հետագա զարգացումը: Ա. Զոհրաբյանը հրապարակեց Փաստաբանների պալատի նախագահի պաշտոնում իր առաջին որոշումը՝ ՓՊ առաջին նախագահ Ռուբեն Սահակյանը պարգևատրվեց «Փաստաբանության ասպետ»  ոսկե մեդալով՝ ՀՀ փաստաբանների պալատի հիմնադրման և բազմամյա փաստաբանական գործունեության ընթացքում ներդրած ավանդի համար: