Փաստ ինֆո

ՀՀ նախագահ Սերժ Սարգսյանը, ներկայացնելով ԵԽ նախարարների խորհուրդը նախագահող Հայաստանը, ելույթ ունեցավ Եվրախորհրդի խորհրդարանական վեհաժողովի լիագումար նիստում: 

«Հայաստանի համար պատիվ և մեծ պատասխանատվություն է գլխավորել Եվրոպայի խորհրդի Նախարարների կոմիտեն»,- ԵԽԽՎ ամբիոնից  հայտարարեց ՀՀ նախագահը:

ՀՀ նախագահն իր ելույթում անդրադարձավ Հայաստանի ընտրած ժողովրդավարական ուղուն, Մաքսային միությանը և Եվրամիության ասոցիացման համաձայնագրին միանալու, Լեռնային Ղարաբաղի խնդրի խաղաղ կարգավորման, ցեղասպանության խնդիրներին:

Նա հայտնեց, որ Հայաստանը վերջերս տոնել է անկախության հռչակման 22-րդ տարեդարձը եւ այդ 22 տարիների ընթացքում շատ բանի է հասել: «Անկախության հռչակագիրը մեր սերունդների երազանքների իրականացումն էր: Հայ հասարակությունը միշտ ձգտել է ունենալ համակարգ, որը հիմնված է ազատության, ժողովրդավարության, օրենքի գերակայության վրա»,-ասաց նախագահը’ ընդգծելով, որ մեր երկիրը հավատարիմ է եվրոպական արժեքների ամրապնդմանը, ժողովրդավարությանը, օրենքի գերակայությանն ու ազատություներին: 

«Մենք ասել ու շարունակում ենք ասել, որ Հայաստանը ձգտում է մոտ լինել Եվրապային` կարեւոր նախաձեռնություն համարելով Արեւելյան գործընկերության ծրագիրը, որն իր ուրույն դերն ունի մի շարք նշանակալի բարեփոխումների գործում»,-նշեց Սերժ Սարգսյանը, հավելելով, որ Հայաստանն ունի դաշնակցային հարաբերություններ Ռուսաստանի հետ, որոնք  արդյունավետորեն շարունակելու է:

«Հայաստանը երբեք չի ձգտել համագործակցություն կառուցել մի գործընկերոջ հետ` ի հակադրություն մյուս գործընկերների»,-հայտարարեց ՀՀ նախագահը, միաժամանակ վստահեցնելով. «Հայաստանը շարունակելու է շահավետ համագործակցությունը Եվրամիության հետ»: