Փաստ ինֆո

Երևանի Ավան և Նոր Նորք վարչական շրջանների դատարանում՝  դատավոր Դավիթ Հարությունյանի նախագահությամբ, այսօրվա դատական նիստը տեղի չունեցավ տուժող Վահե Ավետյանի իրավահաջորդի ու մյուս տուժողների ներկայացուցիչ Տիգրան Եգորյանի բացակայության պատճառով: Փաստաբանը էլեկտրոնային նամակով տեղեկացրել էր դատարանին, որ երեկ իր ազգականն է մահացել, չի կարող ներկայանալ դատարան և խնդրել դատական նիստը հետաձգել:  Տուժողների ներկայացուցիչն այսօր պետք է հանդես գար ճառով, որը նա կհրապարակի  հոկտեմբերի 8-ի դատական նիստում:   

Իսկ նախորդ դատական նիստում մեղադրող Արթուր Դավթյանի մեղադրական ճառով սկսվեց դատական վիճաբանությունների փուլը: Իր մեղադրական ճառում մեղադրողը միջնորդել էր բոլոր 6 ամբաստանյալների համար խիստ պատիժ նշանակել՝ նրանցից յուրաքանչյուրին  դատապարտել 13-ական  տարվա ազատազրկման և  տուգանքի`  100 հազար դրամի չափով:  

Մեղադրողը հիմնավորված էր համարել   ամբաստանյալներ Գարիկ Մարգարյանին, Արթուր Բաբլոյանին, Արման Խաչատրյանին, Արման Բաղդասարյանին, Դավիթ Ադամյանին ու Նորայր Հայրապետյանին առաջադրված մեղադրանքն, ըստ որի նրանք միասնական դիտավորությամբ ծեծի են ենթարկել տուժողներ Վահե Ավետյանին, Արտակ Բայադյանին, Գարիկ Սողոմոնյանին, Արկադի Աղաջանյանին և Էդգար Նիկոյանին: Դրա հետևանքով  Վահե Ավետյանի առողջությանը դիտավորությամբ պատճառվել է կյանքի համար վտանգավոր ծանր վնաս, որն անզգուշությամբ առաջացրել է նրա  մահը,  Արտակ Բայադյանի և Գարիկ Սողոմոնյանի առողջությանը` միջին ծանրության վնաս` առողջության տևական քայքայումով, իսկ Արկադի Աղաջանյանին և Էդգար Նիկոյանին ծեծի արդյունքում մարմնական վնասվածքներ չեն պատճառվել:

Ըստ մեղադրողի,  գործի քննությամբ ձեռք բերված փաստական տվյալներով  ու ապացույցներով  չեն հիմնավորվել պաշտպանական կողմի պնդումները, թե  տուժողները` ռազմական բժիշկներ Վահե Ավետյանը, Արտակ Բայադյանը, Գարիկ Սողոմոնյանը, նրանց ընկերներ Արկադի Աղաջանյանն ու  Էդգար Նիկոյանը գինովցած էին, «ագրեսիվ ու լկտի պահվածք էին դրսևորում»:  Ուստի մեղադրողը որպես արժանահավատ էր գնահատել  տուժողների ցուցմունքները: Արթուր Դավթյանը նկատել էր, որ տուժողներից որևէ մեկը չի պատասխանել ամբաստանյալների ծեծին, չէին էլ կարող, ծեծկռտուքի եզրափակիչ հատվածում՝ռեստորանի ավտոկայանատեղիում նրանք շրջապատված են եղել 15-20 ամրակազմ անվտանգության աշխատակիցներով՝  այդ  թվում ամբաստանյալներով, ովքեր տեղատարափ հարվածներ էին հասցնում տուժողներին: Ուստի, մեղադրողը գտել  է, որ նախաքննության մարմինը ճիշտ  քրեաիրավական գնահատական է տվել հանցագործությանը, ըստ որի ամբաստանյալներն ընդհանուր միասնական դիտավորությամբ  ծեծել են տուժողներին՝ գիտակցելով  մեկը մյուսի գործողություններն ու լրացնելով միմյանց: Տուժողները շրջապատված էին  15-20 հոգու կողմից՝ փաստացիորեն զրկվելով փախչելու կամ պաշտպանվելու հնարավորությունից:  Ըստ Ա.Դավթյանի, արժանահավատ չեն ու գործի տվյալներով չեն հիմնավորվում ամբաստանյալների պնդումները, թե իրենք փորձել են բաժանել կռվողներին կամ ուղղակի կանգնած են եղել. «Այդ դեպքում ինչո՞ւ ամբաստանյալները որևէ բան չհայտնեցին  առնվազն 15 ծեծողներից 9-ի մասին»,- հարց տվեց մեղադրողը:  

Միաժամանակ մեղադրողը գտել էր, որ գործում առկա չեն նաև փաստական տվյալներ՝ տեղի ունեցածը սպանություն որակելու համար, ինչպես պահանջում են տուժող կողմի ներկայացուցիչները: