Փաստ ինֆո

Կառավարություն այսօր գումարած արտահերթ նիստում հաստատեց 2014 թվականի պետական բյուջեի նախագիծը:

Այդ նախագծով հաջորդ տարվա ծախսերը կկազմեն 1 տրիլիոն 272 մլրդ 237 մլն դրամ, եկամուտները` 1 տրիլիոն 127 մլրդ 400 մլն դրամ, իսկ դեֆիցիտը` 110 մլրդ 200 մլն դրամ:

ՀՀ վաչապետ Տիգրան Սարգսյանը նշեց, որ զարգացող երկրներում տեղի է ունենում տնտեսական ցուցանիշների վատթարացում: մասնավորապես՝ Համաշխարհային բանկն ու Արրժույթի միջազգային հիմնադրամը նվազեցրել են Ռուսաստանի աճի կանխատեսումը, ինչը, ըստ Տ. Սարգսյանի, Հայաստանի վրա էական ազդեցություն կարող է թողնել:

Միևնույն ժամանակ, նրա խոսքով, մեր երկրի համար  նոր միջավայր է ստեղծվում, պայմանավորված Մաքսային միությանն անդամակցելով, սակայն, Ինչպես նշեվ վարչապետը, պետք է այնպես անել, որ անցումը լինի սահուն:

«Վերջին տարիներին մասնավոր ներդրումների կրճատում է տեղի ունենում, ուրեմն պետք է մտածենք բիզնես միջավայրի բարելավման մասին և հարկային բեռը ճիշտ բաշխենք, որ տեղի չունենա հարկային բեռի ավելացում: Ամեն տարի հարկեր/ՀՆԱ ցուցանիշը բարձրացնում էինք 0.3 տոկոսային կետով, այս տարի որոշեցինք թողնել նույնը, որ բիզնեսի վրա բացասական ազդեցություն չլինի»,- ասաց Տ. Սարգսյանը:

Նշենք, որ հաջորդ տարի նույնպես պետական բյուջեի հիմնական մասը` 45%-ը հատկացվելու է կրթության, առողջապահության, սոցիալական պաշտպանության, անվտանգության ոլորտներին: Նախատեսվում է նաև աշխատավարձերի և կենսաթոշակների ավելացում:

Կառավարության հաստատած բյուջեի նախագիծը առաջիկայում կներկայացվի նաև Ազգային Ժողովի հաստատմանը: Որպես կանոն խորհրդարանական քննարկումների արդյունքում բյուջեի նախագծում որոշ ցուցանիշներ փոփոխություն են կրում: