Փաստ ինֆո

2014թ-ին կբարձրանան ոչ միայն պետական հատվածի աշխատողների աշխատավարձերը, այլև ուսուցիչներինն ու բժիշկներինը: Բայց աշխատավարձի բարձրացմանը հարկ կլինի սպասել ոչ թե հունվարի 1-ից, այլ տարվա միայն երկրորդ կեսից` հուլիսի 1-ից:

Բանն այն է, որ, ինչպես այսօր բյուջեի նախագծի քննարկման ժամանակ ներկայացրեց ֆինանսների նախարար Դավիթ Սարգսյանը, այս փոփոխությունները հիմնված են նվազագույն աշխատավարձի բարձրացման վրա: Դե իսկ նվազագույն աշխատավարձը բարձրացել էր այս տարի հենց հուլիսի 1-ից:

Նշենք, որ կառավարության հաստատած պետական բյուջեի նախագծով նախատեսվում է աշխատավարձերի բարձրացում 40%-ով:

Ի դեպ, կառավարությունը փորձել է նաև ապահովել տարբեր ճյուղերի աշխատողների աշխատավարձերի միջև համադրելիություն: Վարչապետ Տիգրան Սարգսյանը նշեց, որ  գործադիրը տարբեր ոլորտի ներկայացուցիչների հետ քննարկման արդյունքում կազմել է համադրելի պաշտոնների սանդղակ, որը նույնպես ներկայացվելու է ԱԺ դատին:

«Հասկանալի է, որ այս փաստաթղթի շուրջ բուռն դեբատներ կլինեն: Արդյո՞ք արդար է այս կամ այն պաշտոններն իրար հետ համադրել հենց այդ ցուցանիշներով, թե՞ արդար չէ, կլինեն փաստարկներ հօգուտ այդ տարբերակի կամ հակառակը, բայց մենք պետք է անպայման այդ քաղաքական կոմպրոմիսին հասնենք ԱԺ-ում և դրանից հետո արդեն մեզ համար շատ հեշտ կլինի տարիների ընթացքում պլանավորել աշխատավարձերի քաղաքականությունը ՀՀ-ում »,-ասաց Տիգրան Սարգսյանը: