Փաստ ինֆո

 

Գերասիմ Մնացականյանը  փետրվարի 17-ին` ժամը 20:30-ի սահմաններում, ալկոհոլային հարբածության վիճակում, Սևան  քաղաք  գնալու նպատակով նստել է Երևանի Բագրատունյաց և Արշակունյաց փողոցների խաչմերուկում կայանված Ստեփան Սարգսյանի  «Օպել վեկտրա» մակնիշի տաքսի ավտոմեքենան:

 

Ենթադրելով, որ վերջինս հանդիսանում է 2011թ. օգոստոս ամսին Երևանի մետրոյի Շենգավիթ կայարանի դիմաց տեղի ունեցած վիճաբանության ժամանակ իր ընկերոջը` ոմն Արմենին, դանակահարած անձը, եռակցման սարք բերելու պատճառաբանությամբ նրան քշել է տվել Կոտայքի մարզի Պտղնիում գտնվող այգեգործական հողամասի տարածք, որտեղ եռակցման սարքը մինչև ավտոմեքենան տեղափոխելու օգնության խնդրանքով հրավիրել է Ս.Սարգսյանի հողամասի տարածք և այնտեղ առկա ամառանոցային տնակի մուտքի դռան դիմաց, մարմնական վնասվածք պատճառելու դիտավորությամբ, իր մոտ եղած դանակով հարվածել է Ստեփան Սարգսյանի կրծքավանդակի ձախ կեսի հետին կողմնային մակերեսին, աջ աճուկային շրջանին և աջ ազդրի վերին երրորդականի դրսային մակերեսին, պատճառել նրա առողջությանը թափանցող, կյանքին վտանգ սպառնացող  ծանր վնաս:

 

Մինչև դատաքննության սկսվելը՝ դատական նիստի նախապատրաստական մասում, ամբաստանյալը գրավոր միջնորդություն է ներկայացրել՝ արագացված դատաքննություն կիրառելու մասին՝ հայտարարելով, որ առաջադրված մեղադրանքում իրեն լիովին մեղավոր է ճանաչում և անկեղծորեն զղջում է կատարվածի համար:  Ընդ որում, ըստ ամբաստանյալի՝ ինքը կատարվածի համար  զղջացել է դեպքից անմիջապես հետո. տուժող` Ս.Սարգսյանին մենակ չի թողել, անգամ մեքենան թաղվել է ձյան մեջ, հրել հանել է և նրան ուղեկցել է Երևան` բուժօգնություն ստանալու համար:

 

Տուժող  Ստեփան Սարգսյանը հայտնել է, որ ամբաստանյալ Գերասիմ Մնացականյանի հարազատները ամբողջությամբ հատուցելու են իրեն պատճառված նյութական վնասը, ինքը նրա դեմ որևէ բողոք-պահանջ չունի, խնդրել է նրա նկատմամբ մեղմ վարվել և եթե ամբաստանյալի կողմից արվի արագացված դատավարության միջնորդություն, ինքը չի առարկի:

 

Մեղադրող,  Կոտայքի մարզի դատախազի տեղակալ Վ.Գրիգորյանը մինչև դատաքննությունն սկսելը՝ դատական նիստի նախապատրաստական մասում, չի առարկել՝ Գերասիմ Մնացականյանի նկատմամբ դատական քննությունն անցկացնել արագացված կարգով:  Դատարանը բավարարել է միջնորդությունը: 

 

Կոտայքի մարզի ընդհանուր իրավասության առաջին ատյանի դատարանը՝ դատավոր Յ.Բաղդասարյանի նախագահությամբ, սեպտեմբերի 18-ի դատավճռով Գերասիմ Մնացականյանին մեղավոր  է  ճանաչել՝ ՀՀ քրեական օրենսգրքի 112-րդ հոդվածի 1-ին մասով՝  Դիտավորությամբ առողջությանը ծանր վնաս պատճառելը,  և  դատապարտել 3  տարի 6 ամսվա ազատազրկման:

 

Դատարանը՝ որպես անձը բնութագրող, պատասխանատվությունը և պատիժը մեղմացնող հանգամանքներ է դիտել ամբաստանյալի նախկինում դատված և արատավորված չլինելը, ըստ բնակության վայրի դրական  բնութագրվելը, մեղքն ընդունելը, կատարվածի համար  զղջալը,  խնամքին  չորս երեխա (նրանցից  երեքը անչափահաս են, այդ թվում՝ երկուսը մինչև 14 տարեկան), թոշակառու և վատառողջ ծնողներ, վատառողջ, չաշխատող կին ունենալը, տուժող  Ս.Սարգսյանին օգնություն ցույց տալը, տուժողի` Ս.Սարգսյանի քաղհայցի պահանջ չներկայացնելը  և նրա նկատմամբ մեղմ պատիժ նշանակելու խնդրանք ներկայացնելը:

 

Որպես ամբաստանյալ  Գերասիմ  Մնացականյանի պատասխանատվությունը և պատիժը ծանրացնող հանգամանք դատարանը դիտել  է հանցանքը ալկոհոլի ազդեցության տակ կատարելը: