Փաստ ինֆո

Սեպտեմբերի 19-ին Հռոմում պաշտոնական այցելությամբ գտնվող արտգործնախարար Էդվարդ Նալբանդյանը հանդիպում  է ունեցել Իտալիայի Սենատի արտաքին հարաբերությունների հանձնաժողովի նախագահ Պյեռֆերդինանդո Կազինիի հետ։

Ըստ ՀՀ արտաքին գործերի նախարարության Մամուլի,  տեղեկատվության և հասարակայնության հետ կապի վարչության տարածած հաղորդագրության, հանդիպմանը հանգամանալից քննարկվել է  տարբեր բնագավառներում հայ-իտալական փոխգործակցությունը, մտքեր են փոխանակվել միջխորհրդարանական, ապակենտրոնացված, առևտրատնտեսական համագործակցության շուրջ, կարևորվել խորհրդարանական դիվանագիտության դերը երկու երկրների միջև հարաբերությունների զարգացման գործում։   Զրուցակիցները մտքեր են փոխանակել    սիրիական ճգնաժամի հանգուցալուծման ուղիների, Իրանի միջուկային ծրագրի շուրջ բանակցային գործընթացի հարցերի վերաբերյալ։

Հռոմի քաղաքապետ Ինյացո Մարինոյի հետ զրույցի ընթացքում անդրադարձ  է կատարվել  շուրջ երեքհազարամյա պատմություն ունեցող երկու մայրաքաղաքների`  Երևանի և Հռոմի միջև համագործակցության հաստատման ուղղությամբ ձեռնարկվելիք քայլերի վերաբերյալ։ Երկուստեք կարևորվել է  Հռոմում և Երևանում համատեղ մշակութային միջոցառումների կազմակերպումը, ինչը զրուցակիցների համոզմամբ լուրջ խթան կհանդիսանա երկկողմ հարաբերությունների խորացման համար։Հանդիպմանը քննարկվել է մշակույթի, տուրիզմի և առողջապահության ոլորտներում Երևանի և Հռոմի միջև հնարավոր համագործակցության առնչվող հարցեր։

Հռոմում նախարար Նալբանդյանը հանդիպել է նաև  Իտալիայի Սենատի և Պատգամավորների պալատի Հայաստանի հետ բարեկամության խմբի անդամների հետ։ Նախարար Նալբանդյանը գոհունակությամբ նշել է, որ Իտալայի խորհրդարանում  հարյուրից ավելի անդամ ունեցող Հայաստանի հետ բարեկամության պատգամավորական խումբը կարևոր ներդրում կարող է ունենալ հայ-իտալական համագործակցության զարգացման գործում։

Սեպտեմբերի 19-ին  տեղի է ունեցել նաև Սուրբ Աթոռում (Վատիկանում)  ՀՀ դեսպանության բացման և ՀՀ անկախության 22-րդ տարեդարձի  կապակցությամբ ընդունելությունը, «Սուրբ Գրիգոր Լուսավորիչ. քրիստոնեության ընդհանուր ժառանգություն» ցուցահանդեսի բացումը։

Վատիկանում ՀՀ դեսպանի կողմից տրված ընդունելությանը ներկա են եղել  Սուրբ Աթոռի Արևելյան եկեղեցիների միաբանության ղեկավար և Արևելյան պապական խորհրդի նախագահ Կարդինալ Լեոնարդո Սանդրին, Սուրբ Աթոռի Պետությունների հետ հարաբերությունների հարցերով քարտուղար արքեպիսկոպոս Դոմինիկ Մամբերտին, Հայ առաքելական եկեղեցու հոգևորականներ, Հայ կաթոլիկ եկեղեցու ներկայացուցիչներ, Վատիկանի բարձրաստիճան հոգևորականներ, Հայաստանի և Իտալիայի խորհրդարանների անդամներ, Վատիկանում հավատարմագրված դեսպաններ, եվրոպական և իտալական հասարակական կազմակերպությունների ղեկավարներ, գործարարներ, հայ համայնքի ներկայացուցիչներ:    

Ընդունելությանը ԱԳ նախարար Էդվարդ Նալբանդյանը մեծապես խորհրդանշական է համարել, որ Հայաստանը` հանդիսանալով քրիստոնեությունը պետական կրոն հռչակած առաջին երկիրը, դիվանագիտական ներկայացուցչություն է բացում Սուրբ Աթոռում:«Հայաստանի Հանրապետության դեսպանության բացումը վկայում է Հայաստանի և Սուրբ Աթոռի միջև սերտ բարեկամական հարաբերությունների բարձր մակարդակի մասին, բայց արտացոլում է նաև այդ հարաբերություններն առավել սերտացնելու և խորացնելու մեր երկրի ցանկությունը» - ընդգծել է  Հայաստանի արտաքին քաղաքական գերատեսչության ղեկավարը։  

Է.Նալբանդյանը նշել է նաև, որ Հայաստանը բարձր է գնահատում 2000թ.-ին Հայոց ցեղասպանության ճանաչումը Սուրբ Աթոռի կողմից, որը վերահաստատվել  է  նաև 2001թ.-ին:

Վատիկանում ՀՀ դեսպանության բացման կապակցությամբ Սուրբ Աթոռի անունից ողջույնի խոսքով հանդես է  եկել   Արևելյան եկեղեցիների միաբանության ղեկավար և Արևելյան պապական խորհրդի նախագահ Կարդինալ Լեոնարդո Սանդրին։

Էդվարդ Նալբանդյանը այցելել է  նաև Սուրբ Աթոռում Հայաստանի դեսպանատուն, ծանոթացել  դեսպանության աշխատանքային պայմաններին, հանդիպել դեսպանության աշխատակիցների հետ։