Փաստ ինֆո

Թերթը գրում է, որ ոստիկանության հատուկ կարևորագույն գործերով վարչությունը խիստ գաղտնիության պայմաններում քննում է օրենքով գող, հանգուցյալ Ասլան Ուսոյանի  մերձավորներից մեկի՝ գավառցի Ռաֆիկ Մադոյանի սպանության նախապատրաստության վերաբերյալ գործը:

Արդեն մեկ անգամ Մոսկվայում նրա վրա արդեն կատարվել էր մահափորձ, որի ժամանակ տուժել էր նրա թիկնապահը:

Թերթի տեղեկություններով՝ սպանության նախապատրաստությունը, որը ՀՀ ոստիկանության քննչականի վարույթում է, առանձին գործ է և Մոսկվայում տեղի ունեցածի հետ ուղիղ կապ չունի:

Լրատվամիջոցը նշում է, որ այս գործի շրջանակներում մայիսին 6 անձ կալանավորվել է: Նրանք այժմ «Նուբարաշեն» ՔԿՀ-ում են, սակայն այս 5 ամիսների ընթացքում, ինչպես նշում է թերթը, քննչական գործողություններ գրեթե չեն կատարվել: Սա զարմանալի է, քանի որ ոստիկանությունը մոտ մեկ տարի զբաղվել է այս հանցավոր խմբի բացահայտմամբ:

Թղթակիցը զրուցել է կալանավորվածներից Գևորգ Պետրոսյանի հանրային պաշտպանի՝ Վարդան Գրիգորյանի հետ, ով նշել է, որ ոչ մի ապացույց չի ներկայացվել:

«Հենց հիմա իմ պաշտպանյալն ակնհայտ ապօրինի պահվում է քրեակատարողական հիմնարկում, և նրան առանց ապացույցների մեղադրում են: Իմ պաշտպանյալին մայիսի 14-ից մինչև այսօր մի անգամ որպես կասկածյալ են հարցաքննել, մի անգամ էլ՝ որպես մեղադրյալ»,- ասել է պաշտպանը: Նույնը պնդում են նաև գործով ներգրավված մյուս փաստաբանները: Լուսինե Սահակյան ը, ով պաշտպանում է Սարգիս Զազյանի շահերը, ասել է, որ իրեն հայտնի չէ, թե ինչ սպանության նախապատրաստության մասին է խոսքը:

«Գործին առնչվող բոլոր փաստաբանները զարմանալիորեն լուռ են, իսկ մեղադրյալների ընտանիքները կարծես թե վախեցած են  կամ էլ ազդված ինչ-որ բարձրաստիճան միջնորդություններից»,- գրում է թերթը: 

Հոդվածն ամբողջությամբ կարող եք կարդալ «Հրապարակ» օրաթերթի՝ 19.09.13թ. համարում: