Փաստ ինֆո

Թերթի ուշադրության կենտրոնում է Սյունիքի նախկին մարզպետ Սուրիկ Խաչատրյանի տան մոտ հունիսի 1-ին տեղի ունեցած դեպքը: Լրատվամիջոցը, անդրադառնալով թեմային, հիշեցնում է, որ օրերս ՀՀ ՊՆ քննչական ծառայությունը հերքել էր Բուդաղյանների փաստաբան Հայկ Ալումյանի՝ ավելի վաղ արած հայտարարությունները, մասնավորապես այն հայտարարությունները, որ Սուրիկ Խաչատրյանն ապօրինի ինքնաշեն զենք ունի, որ Բուդաղյան եղբայրներին թիկունքից չեն կրակել, կրակոցը եղել է վերևից: Այս և այլ հարցերի շուրջ թերթի թղթակիցը զրուցել է Հայկ Ալումյանի հետ:

Հ.Ալումյանը նշել է, որ կայացված որոշումները, մասնավորապես՝ Տ.Խաչատրյանի և Զ.Նիկողոսյանի նկատմամբ քրեական գործը կարճելու մասին որոշումը, ինչպես նաև հարակից որոշումը՝ Ա.Բուդաղյանի կողմից քրեական օրենսգրքով նախատեսված արարքներ գործելու վերաբերյալ, բողոքարկվել են: Փաստաբանը միևնույն ժամանակ ասել է, որ հրաժարվել են գործի նյութերն իրեն տրամադրել, որպեսզի տեսնի բողոքի հիմքերը, բողոքը հիմնավորող ապացույցները:

«Այսինքն՝ բողոքարկման իրավունքը կա, բայց բողոքարկման հնարավորությունը՝ ամեն ինչ անում են, որ սահմանափակվի, որպեսզի ես չկարողանամ հիմնավոր բողոք գրել: Առայժմ այն փուլում ենք, որ ինձ հրաժարվում են նյութերը տրամադրել»,- ասել է փաստաբանը:

Թղթակցի այն հարցին՝ չէ՞ որ ըստ օրենքի՝ նախաքննության ընթացքում կողմերը ոչ բոլոր նյութերին կարող են ծանոթանալ, Հայկ Ալումյանը պատասխանել է, որ ինքն իրավունք ունի ծանոթանալու միայն որոշակի նյութերի, բայց միևնույն ժամանակ կայացվել է այնպիսի որոշում, որն ինքն իրավունք ունի բողոքարկելու:

 «Այդ իրավունքը ձևական իրավունք է դառնում, եթե ես նյութեր չունեմ, այսինքն՝ այդ բողոքը դառնում է զուտ վերնագիր՝ բողոք, և տակը՝ խնդրում եմ վերացնել: Ես ոչ մի ապացույց չեմ կարողանում ներկայացնել՝ բացառությամբ իմ պաշտպանյալի ցուցմունքների»,- ասել է Ալումյանը:

Իսկ այն դիտարկմանը, որ քննիչը ապացուցված է համարել, որ Ավետիք Բուդաղյանը քրեական օրենսգրքով նախատեսված արարքներ է գործել, բայց նրա նկատմամբ քրեական հետապնդումը դադարեցվել է ՝ մահվան պատճառով, Հայկ Ալումյանը նշել է, որ ըստ որոշման Ավետիք բուդաղյանը սպանության փորձ է կատարել: Բացի զենքի հոդվածից՝ նա նաև երկու այլ հոդվածներով է մեղավոր, սակայն քրեական հետապնդումը պետք է դադարեցվի, քանի որ նա մահացել է:  

Իր խոսքում Հայկ ալումյանն այս կապակցությամբ ասել է. «Մենք կտրականապես դեմ ենք  այս գնահատականներին, բողոքարկել ենք նաև այդ որոշումը: Օրենքի մեջ կա այսպիսի մի դրույթ, որ եթե այդ հիմքով է քրեական հետապնդումը դադարեցվել, ապա պետք է քրեական հետապնդումը շարունակվի, եթե դա անհրաժեշտ է մահացածի իրավունքների վերականգնման համար: Հիմա մենք ասում ենք՝ մահացածի իրավունքների վերականգնման համար դուք գործը քննեք, ավարտեք, ուղարկեք դատարան: Պիտի դատավարություն լինի, դատարանը պիտի որոշի՝ ավետիք Բուդաղյանը իրոք այդ հանցագործությունները կատար՞լ  է, թե՞ ոչ»: 

Հոդվածն ամբողջությամբ կարող եք կարդալ «168 ԺԱՄ» օրաթերթի՝ 19.09.13թ. համարում: