Փաստ ինֆո

Նախորդ տարվա 4 դեպքերի համեմատ այս տարի Հայաստանում գրանցված կիբերհանցագործությունների դեպքերը շուրջ 10 անգամ աճել են՝ հասնելով 45-ի:

Պաշտոնական վիճակագրության համաձայն, դրանցից 30-ը համակարգչային տեխնիկայի միջոցով կատարված  հափշտակությությունների դեպքերն են, 15-ը՝ համակարգչային տեղեկատվության անվտանգության դեմ ուղղված հանցագործությունները և 2 դեպք վերաբերում է համակարգչի միջոցով մանկական պեռնոգրաֆիայի տարածմանը: 

Կիբերհանցագործությունների թվաքանակի աճը մեր երկրում համաշխարհային միտումների համատեքստոււմ է: Բանն այն է, որ 2013թ-ի համար միջազգային վերլուծաբանները նախապես կանխատեսել էին աշխարհում այս կարգի հանցագործությունների աճ ավելի քան 200 անգամ:

Ի դեպ, նշենք, որ օրինակ, ԱՄՆ-ը և Չինաստանն արդեն իրենց զինված ուժերում ունեն հատուկ կիբերզորքեր, որոնք կոչված են պաշտպանելու երկրի վիրտուալ սահմանները: ՌԴ-ը շուրջ մեկ ամիս առաջ ևս նման մտադրության մասին պաշտոնական հայտարարությամբ հանդես եկավ: Հայաստանն, իհարկե, նման զորամիավորում չունի և մոտ ապագայում հազիվ թե ունենա, սակայն, ինչպես վստահեցնում են ոլորտի պատասխանատուները, պատրաստ է դիմակայել համաշխարհային այս նոր մարտահրավերներին:

ՀՀ ԳԴ ՀՀ ԱԱ մարմիններում քննվող և կիբերհանցագործությունների գործերով վարչության պետ Արթուր Գոյունյանը մեզ հետ զրույցում նշեց, որ այդ նպատակով, Ոստիկանության ՔԳՎ ՀԿԳ քննության վարչությունում առանձնացվել են քննիչներ, որոնք մասնագիտանում են հենց կիբերհանցագործությունների գործերով քննության մեջ:

«Պետք է ասեմ, որ ապագան տանում է նրան, որ բարձր տեխնոլոգիաները մեր կյանքում գնալով ավելի մեծ տեղ են զբաղեցնում: Կգան ժամանակներ, երբ համակարգիչը կլինի ավելի հզոր զենք, քան ավանդական զինատեսակները, զարգացումը տանում է դրան և մենք պետք է ժամանակին համաքայլ գնանք, որպեսզի հետ չմնանք, կարողանանք դիմակայել արդի մարտահրավերներին»,-նշեց Արթուր Գոյունյանը:

Մեր զրուցակցի խոսքով, վիրտուալ հանցագործություններից ներկայում առավել հաճախ տուժում են բանկերի հաճախորդները, էլեկտրոնային վճարումների համակարգում հանդես եկող անձինք, ինչպես նաև հեռախոսային ցանցերի, մոբիլ առևտրի ծառայությունների օգտատերերը: 

«Վերջին ժամանակներս աշխարհում մեծ տարածում է ստացել էլ դրամապանակով վճարման վիջոցը, ինչպես նաև մոբիլ առևտուրը, որոնք տարածում են ստանում նաև մեր հանրապետությունում: Այդ ուղղությամբ ևս պետք է ձեռնարկվեն կանխարգելիչ միջոցառումներ»,- ասաց, Արթուր Գոյունյանը և հավելեց. «Մինչդեռ բնակչության զգալի մասը նույնիսկ չգիտե, թե ինչ է կիբերհանցագործությունը և, օգտվելով տեղեկատվական տեխնոլոգիաների վերջին միջոցներից, չեն էլ պատկերացնում, թե կարող են դառնալ կիբերհանցագործության զոհ»:

Ուստի այս պարագայում, կիբերզորքերի կազմավորումից առավել կարևորվում է հատկապես բնակչության իրազեկվածության մակարդակի բարձրացումը: