Փաստ ինֆո

ՀՀ ՊՆ N  զորամասի  հրամանատարի տեղակալ,  փոխգնդապետ Սարգիս  Տիտանյանին մեղադրանք էր առաջադրվել՝  սուտ ցուցմունք տալու համար: Ս.Տիտանյանն, ըստ առաջադրված մեղադրանքի,   Արարատի և Վայոց Ձորի մարզերի ընդհանուր իրավասության առաջին ատյանի դատարանում որպես տուժող նախազգուշացված լինելով սուտ ցուցմունք տալու դեպքում նախատեսված քրեական պատասխանատվության մասին,  տվել է սուտ ցուցմունք: 

 

Տուժողն, ըստ մեղադրանքի,   դատարանին հայտնել էր, որ իր  և  ամբաստանյալների միջև 2011 թվականի օգոստոսի 13-ին N զորամասի հսկիչ անցագրային կետի դիմաց տեղի ունեցած միջադեպի ժամանակ իրեն հարվածել և մարմնական վնասվածք է պատճառել Գ.Թովմասյանը, իսկ Նիկոլաևի և Ազիզյանի կողմից համապատասխանաբար իր նկատմամբ բռնություն գործելու և դրա համար նպաստավոր պայմաններ ստեղծելու հետ կապված՝ որևէ հստակ գործողություններ կատարելու վերաբերյալ տեղեկություն չէր հայտնել` չհաստատելով վերջիններիս կողմից միջադեպի ընթացքում իրեն հարվածելու հանգամանքը: 

 

Նախաքննական մարմինը նշված քրեական գործով տուժողին մեղադրանք էր առաջադրել՝ սուտ ցուցմունք տալու համար, սակայն առաջադրված մեղադրանքում Սարգիս Տիտանյանն իրեն մեղավոր չի ճանաչել՝ ոչ նախաքննության եւ ոչ էլ դատաքննության ընթացքում: 

 

Հանցագործության մասին հաղորդման մեջ և իր առաջին ցուցմունքում ամբաստանյալը նշել է, որ  Թովմասյանը, Նիկոլաևն ու Ազիզյանը խառը հարվածներ են հասցրել իրեն: Տվյալ դեպքում, ըստ նրա,  ինքը ներկայացրել է դեպքի` իր կողմից ընկալված ընդհանրական պատկերը, իսկ հետագա քննության ընթացքում ներկայացրել է մանրամասները: Ընդ որում, բացի Թովմասյանի առաջին հարվածից՝ ստացած մյուս հարվածների քանակի ու դրանցից որ մեկը կոնկրետ ում կողմից հասցված լինելու վերաբերյալ հանցագործության մասին հաղորդման մեջ և իր առաջնային ցուցմունքում ևս ոչինչ չի նշել, քանի որ հիշողության մեջ հստակ տպավորվել է միայն Թովմասյանի առաջին հարվածն ու Նիկոլաևի և Ազիզյանի կողմից իր ուղղությամբ հարձակվելը, որից հետո ստեղծվել է խառնաշփոթ իրավիճակ ու ստիպված է եղել պաշտպանվել հարվածներից:

 

Նրանց կողմից իրեն խառը հարվածներ հասցված լինելու վերաբերյալ իր ենթադրության համար հիմք է հանդիսացել ինչպես Նիկոլաևի և Ազիզյանի կողմից իր ուղղությամբ ագրեսիվ կերպով վազելու պահը նկատելը, այնպես էլ` դրանից հետո մարմնի վրա հարվածների ինտենսիվության ավելացումը, այդ թվում նաև՝ մարմնի աջ և ձախ հատվածներում նույնպես հարվածներ զգալը, որպիսիք չէին կարող հասցվել միայն Թովմասյանի կողմից: Իսկ այդ ժամանակ դեպքի վայրում եղել են ինքը, նրանք` երեքով, և գումարտակի շտաբի պետ Սարգսյանը, ով իր հետ որևէ խնդիր չի ունեցել ու բացառել է նրա կողմից իրեն հարված հասցվելու հանգամանքը: Այդ ամենն ինքը պնդել է նաև Թովմասյանի և մյուսների վերաբերյալ քրեական գործի քննության ընթացքում, այդ թվում նաև՝ դատարանում, իսկ կոնկրետ Նիկոլաևի և Ազիզյանի կողմից իրեն հարվածներ հասցնելու վերաբերյալ հստակ տեղեկություն չի հայտնել, քանի որ վերջիններիս կողմից իրեն կոնկրետ հարվածներ հասցնելու պահը չի նկատել, այլ ենթադրել է, որ նրանք ևս հարվածած կլինեն իրեն:

 

Թովմասյանի և մյուսների վերաբերյալ քրեական գործի դատաքննության ընթացքում դատավարության մասնակիցների և դատարանի հարցադրումներին տրված իր` «հնարավոր է» կամ «կարող է»  պատասխանների վերաբերյալ ամբաստանբյալը նշել է, որ  հարցադրումները վերաբերել են ենթադրությանը, ուստի՝ ինքը ևս պատասխանել է այդ կերպ: Սուտ ցուցմունք տալու նպատակ չի հետապնդել և քննությանը որևէ սուտ տեղեկություն չի հայտնել:

 

Դատարանը հանգել  է այն հետևության, որ Սարգիս Տիտանյանի արարքում բացակայում է ՀՀ քրեական օրենսգրքի 338-րդ հոդվածի 2-րդ մասի 1-ին կետով նախատեսված հանցակազմը: Մասնավորապես,   քրեական գործով նախաքննության, ինչպես նաև  դատաքննության ընթացքում Սարգիս Տիտանյանը որևէ կերպ չի ժխտել Ս.Նիկոլաևի և Է.Ազիզյանի կողմից ևս իրեն հարվածներ հասցնելու հնարավորությունը: Ավելին, բացառել է, որ իր ստացած բոլոր հարվածները կարող էր հասցնել միայն Գոռ Թովմասյանը, ինչպես նաև հստակ կերպով նկարագրել է Ս.Նիկոլաևի և Է.Ազիզյանի կողմից իր վրա հարձակվելու հանգամանքը՝ միաժամանակ նշելով, որ վերջիններիս հարձակումից հետո իր մարմնի վրա զգացել է հարվածների ինտենսիվության ավելացում, այդ թվում` դիմացի ու կողային հատվածներում:

 

Ըստ դատարանի,  Սարգիս Տիտանյանի կողմից տրամադրված տեղեկությունների մեջ տեղ գտած տարբերվող ձևակերպումները  չեն կարող գնահատվել՝ որպես ՀՀ քրեական օրենսգրքի 338-րդ հոդվածի իմաստով` իրականությունը խեղաթյուրելու միջոցով սուտ ցուցմունք տալու դրսևորում՝ հենց միայն այն պատճառով, որ այդպիսիք համակցության մեջ չէին կարող նշանակություն ունենալ գործի լուծման համար:

 

Սեպտեմբերի 12-ի դատավճռով  դատարանը ճանաչել և հռչակել է  Սարգիս  Տիտանյանի անմեղությունը՝ ՀՀ քրեական օրենսգրքի 338-րդ հոդվածի 2-րդ մասի 1-ին կետով առաջադրված մեղադրանքով` նրա արարքում հանցակազմի բացակայության հիմքով: