Փաստ ինֆո

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, այսօր հրապարակեց  թմրամիջոցների ապօրինի շրջանառության աղմկահարույց գործով դատավճիռը: 

Դատարանն  ամբաստանյալ Արթուր  Պետրոսյանին մեղավոր ճանաչեց ՀՀ քրեական օրենսգրքի 266-րդ հոդվածի 1-ին մասով, 266-րդ հոդվածի 2-րդ մասի 2-րդ կետով, 34-266-րդ հոդվածի 2-րդ մասի 2-րդ կետով՝ թմրամիջոցների, հոգեներգործուն նյութերի, դրանց համարժեքների ու պրեկուրսորների ապօրինի շրջանառությունն իրացնելու նպատակով, խոշոր չափերով իրացնելու նպատակով թմրամիջոցների ապօրինի շրջանառություն ու դրա փորձը: Պատիժների մասնակի գումարման  սկզբունքի կիրառմամբ,  դատարանը ամբաստանյալ  Ա. Պետրոսյանի նկատմամբ պատիժ նշանակեց ազատազրկում 13  տարի ժամկետով` առանց գույքի բռնագրավման: Նշանակված պատժին մասնակիորեն գումարվեց   նախորդ` Կոտայքի մարզի ընդհանուր իրավասության առաջին ատյանի դատարանի 23.12.2011թ. դատավճռով և նույն դատարանի 18.07.2012թ. որոշմամբ նշանակված պատժի չկրած մասից` ազատազրկում 1  տարի ժամկետով,  և ամբաստանյալ Արթուր  Պետրոսյանի նկատմամբ պատիժ նշանակվեց   ազատազրկում 14 տարի ժամկետով` առանց գույքի բռնագրավման: 

Ամբաստանյալ Ալբերտ   Հակոբյանը  մեղավոր ճանաչվեց ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով, 34-38-266-րդ հոդվածի 2-րդ մասի 2-րդ կետով նախատեսված հանցանքներում՝ իրացնելու նպատակով խոշոր չափերով թմրամիջոցների ապօրինի շրջանառության օժանդակություն և դրա փորձ: Դատավճռով պատիժների մասնակի գումարման սկզբունքի կիրառմամբ, ամբաստանյալ Ալբերտ  Հակոբյանի նկատմամբ պատիժ նշանակվեց   ազատազրկում 12 տարի ժամկետով` առանց գույքի բռնագրավման: 

Դատարանը ճանաչեց ու հռչակեց  ամբաստանյալ Ալլա Մախովայի անմեղությունը` Հայաստանի Հանրապետության քրեական օրենսգրքի 34-38-266-րդ հոդվածի 2-րդ մասի 1-ին և 2-րդ կետերով նախատեսված հանցանքի կատարման մեջ և նրան այդ մեղադրանքով արդարացրեց` հանցակազմի բացակայության հիմքով:

Ամբաստանյալ Ալլա  Մախովան  մեղավոր ճանաչվեց   ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով նախատեսված հանցանքում և դատապարտվեց   ազատազրկման 8  տարի ժամկետով` առանց գույքի բռնագրավման: 

Ամբաստանյալ Արտաշես Բաղումյանը մեղավոր ճանաչվեց   Հայաստանի Հանրապետության քրեական օրենսգրքի 268-րդ հոդվածի 1-ին մասով և 268-րդ հոդվածի 2-րդ մասի 2-րդ կետով նախատեսված հանցանքներում՝  առանց իրացնելու նպատակի թմրամիջոցների ապօրինի շրջանառություն: Պատիժների մասնակի գումարման սկզբունքի կիրառմամբ, ամբաստանյալ Արտաշես Բաղումյանի նկատմամբ պատիժ նշանակվեց   ազատազրկում 3 տարի ժամկետով: 

Ամբաստանյալ Կարեն Արզումանյանը  մեղավոր ճանաչվեց   Հայաստանի Հանրապետության քրեական օրենսգրքի 34-268-րդ հոդվածի 1-ին մասով՝ առանց իրացնելու նպատակի թմրամիջոցների ապօրինի շրջանառության փորձ և դատապարտվեց   ազատազրկման 9 ամիս ժամկետով: Նշանակված պատժին մասնակիորեն գումարվեց նախորդ` Երևանի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի 2011թ. հունիսի 20-ի դատավճռով և նույն դատարանի 2011թ. դեկտեմբերի 19-ի որոշմամբ նշանակված պատժի չկրած մասից` ազատազրկում 6 տարի ժամկետով և ամբաստանյալ Կարեն Արզումանյանի նկատմամբ պատիժ նշանակվեց  ազատազրկում 6 տարի 9  ամիս ժամկետով: 

Դատավճռով ամբաստանյալ Լևոն Շահինյանը  մեղավոր ճանաչվեց  Հայաստանի Հանրապետության քրեական օրենսգրքի 34-268-րդ հոդվածի 1-ին մասով նախատեսված հանցանքում և դատապարտվեց   ազատազրկման 9  ամիս ժամկետով: Նշանակված պատժին մասնակիորեն գումարվեց   նախորդ` Երևանի Շենգավիթ վարչական շրջանի ընդհանուր իրավասության առաջին ատյանի դատարանի 2010թ. հուլիսի 08-ի դատավճռով և նույն դատարանի 2011թ. հունիսի 22-ի որոշմամբ նշանակված պատժի չկրած մասից` ազատազրկում 9  ամիս ժամկետով և ամբաստանյալ Լևոն Շահինյանի նկատմամբ պատիժ նշանակվեց   ազատազրկում 1 տարի 6  ամիս ժամկետով: 

Ամբաստանյալ Սահակ Սահակյանը մեղավոր ճանաչվեց   Հայաստանի Հանրապետության քրեական օրենսգրքի 34-38-268-րդ հոդվածի 1-ին մասով նախատեսված հանցանքում և դատապարտվեց  կալանքի 2   ամիս ժամկետով: ՀՀ քրեական օրենսգրքի 70-րդ հոդվածի  կիրառմամբ, ամբաստանյալ Սահակ  Սահակյանի նկատմամբ նշանակված պատիժը պայմանականորեն չի կիրառվի`նրա նկատմամբ կսահմանվի  փորձաշրջան 1  տարի ժամկետով: 

Ամբաստանյալ Արմինե Գրիգորյանը մեղավոր ճանաչվեց  Հայաստանի Հանրապետության քրեական օրենսգրքի 34-38-268-րդ հոդվածի 1-ին մասով նախատեսված հանցանքում և դատապարտվեց   պայմանական ազատազրկման 3  ամիս ժամկետով՝ 1  տարվա փորձաշրջանով: 

Դատավճռի օրինական ուժի մեջ մտնելուց հետո, 20.09.2012թ. և 17.12.2012թ. որոշումներով իրեղեն ապացույցներ ճանաչված թմրամիջոցները, 103.000, 98.000 և 87.000 ՀՀ դրամ գումարները, «Ռեդդի» յուղի պլաստմասայե տարան կվերադարձվի  վարույթն իրականացնող մարմնին` քրեական գործից անջատված մասով տնօրինելու համար:

Այս գործը հասարակական հնչեղություն ստացավ  հատկապես մեղադրողի նկատմամբ բռնության հետ կապված:  Ա. Պետրոսյանը 2013թ. հուլիսի 12-ի հերթական դատական նիստի ավարտից անմիջապես հետո գործով մեղադրող` ՀՀ գլխավոր դատախազության թմրամիջոցների ապօրինի շրջանառության հանցագործությունների գործերով բաժնի դատախազ Վ. Միլիտոնյանի կողմից ներկայացված մեղադրական ճառի, պատժի և պատժաչափի վերաբերյալ կատարված միջնորդության հետ կապված նրա հասցեին տվել էր  սպանության, առողջությանը վնաս պատճառելու սպառնալիքներ, որը զուգորդվել էր  մեղադրողի առողջության համար ոչ վտանգավոր բռնություն գործադրելով, այն է` Ա. Պետրոսյանը ջրով լի պոլիմերային շշով հարվածել է Վ. Միլիտոնյանի գլխին:  Նախաքննությամբ ձեռք բերված ապացույցների հիման վրա ամբաստանյալ Ա. Պետրոսյանին մեղադրանք էր առաջադրվել ՀՀ ՔՕ 347-րդ հոդվածի 3-րդ մասով՝ արդարադատություն իրականացնելու հետ կապված սպառնալիքը կամ բռնի գործողությունները: Գործն ուղարկվել է դատարան: