Փաստ ինֆո

Թերթն անդրադարձել ՀՀ գլխավոր դատախազի պաշտոնավարման ավարտի, հրաժեշտի և նոր նշանակման թեմային, որի շուրջ թղթակիցը զրուցել է ՀՀ գլխավոր դատախազի տեղակալ Արմեն Դանիելյանի հետ:

Ա.Դանիելյանը շեշտել է, որ Ա.Հովսեփյանն ունեցել է ձևավորված այնպիսի աշխատանքային թիմ, դատախազությունն այնպիսի կայուն պետական մարմին է, որ որևէ ցնցում, որևիցե պարագայում  երբեք տեղի չի ունենա:

Թղթակցի այն հարցին, թե ով կարող է փոխարինել Ա.Հովսեփյանին, գլխավոր դատախազի տեղակալը պատասխանել է, որ այսօր արժանի իրավաբաններ, իհարկե, կան, բայց ինքը չի կարող ասել, թե ով կլինի:

Իսկ թղթակցի այն դիտարկմանը, որ դատախազությունը փակ հիմնարկ է և հասարակությունը շատ վատ վերաբերմունք ուն ի դատախազության նկատմաբ, Ա.Դանիելյանն ասել է. «Ձեզ որտեղի՞ց այդ կարծիքը, որտեղի՛ց է ստեղծվել այդ կարծրատիպը, որ դատախազությունը փակ գերատեսչություն է: Այդպես չի կարելի մաիանշանակ որակում տալ, որ դատախազությունը փակ ստրուկտուրա է: Բացարձակապես ոչ, իրականությանը չհամապատասխանող  տեղեկություն է»:  

Լրագրողը նաև հետաքրքրվել է, թե աշխատակիցները շարունակելու՞ են իրենց աշխատանքը հաջորդ դատախազի հետ, թե՞ հեռանալու են: Ի պատասխան՝ Ա.Դանիելյանն ասել է, որ յուրաքանչյուր դատախազ ինքն է որոշում իր մնալու, չմնալու նպատակահարմարության խնդիրը:

Իսկ այն հարցին, թե Ա.Հովսեփյանի հեռանալուց հետո ինչպիսին կլինի կառույցի հետագա ճակատագիրը, գլխավոր դատախազի տեղակալ Ա.Դանիելյանն ասել է. 

«Երկար տարիների ընթացքում պարոն Հովսեփյանը ստեղծել է այնպիսի մի համակարգ, որ այդ համակարգը կայուն կմնա իր դիրքերում: Որևէ արտառոց բան տեղի չի ունենալու, դրանում համոզված եղեք: Իսկ մնացած հարցերի հետ կապված՝ համակարգն ամուր հիմքերի վրա է ու այդպես էլ կշարունակի լինել»:  

Հոդվածն ամբողջությամբ կարող եք կարդալ «Ժողովուրդ» օրաթերթի՝ 14.09.13թ. համարում: