Փաստ ինֆո

Բյուջեից  առանձնապես խոշոր չափերի հափշտակության գործով ցայժմ դատական կարգադրիչները ոստիկանության դեպոզիտ հաշվին են փոխանցել 35 մլն դրամ գումար, որից շուրջ 27 մլն-ը փոխանցվել է Դատական կարգադրիչների ծառայության պետ, ի պաշտոնե Դատական դեպարտամենտի ղեկավարի տեղակալ Արմեն Մովսիսյանի կողմից: 

Նախաքննության այս պահի տվյալներով, նա մեղադրվում է խմբով շուրջ 59 մլն դրամ բյուջեից հափշտակելու մեջ, սակայն բացառված չէ, որ հետագայում այդ թիվը նախաքննությամբ ձեռք բերված ապացույցների հիման վրա  կմեծանա: 

Ըստ «Փաստինֆո»-ի ունեցած տեղեկությունների, Ա.Մովսիսյանն ընդունում է, որ հափշտակություններ եղել են, սակայն դրանում սեփական մեղքը  չի ընդունում:   

Գործով որպես մեղադրյալ ներգրավվել է նաև Դատական կարգադրիչների ծառայության պետի  տեղակալ Գագիկ Խաչատրյանը, իսկ  մյուս տեղակալի`Գեղամ Գրիգորյանի նկատմամբ հայտարարվել է հետախուզում: 

Ըստ «Փաստինֆո»-ի ունեցած տեղեկատվության, դատական կարգադրիչների համակարգում աշխատավարձերի յուրացման դեպքեր են բացահայտվել, որն իր ընդգրկմամբ հավակնում է դառնալ սոցիալական չարաշահումների աղմկահարույց գործերից հետո երկրորդը: Քննությամբ բացահայտվել են մի քանի տասնյակ անձինք, ովքեր գրանցված են եղել, սակայն չեն ներկայացել աշխատանքի, իսկ նրանց աշխատավարձերը ստացել ու յուրացրել են նրանց պետերը: Ընդ որում, չարաշահումներն ընդգրկել են տարբեր ընդհանուր իրավասության դատարանների դատական կարգադրիչների կառույցներ, իսկ «կծիկը» գլորվում ու հասնում է մինչև դատական կարգադրիչների ծառայության կենտրոնական համակարգ:Մեղադրանքներ են առաջադրվել նաև դատական կարգադրիչների ծառայության տարբեր ստորաբաժանումների ղեկավարներին: