Փաստ ինֆո

ՀՀ փաստաբանների  պալատի  նախագահի թեկնածուներ Արա Զոհրաբյանի ու Կրոմվել Գրիգորյանի  բանավեճ-քննարկումը անցավ  բնականոն աշխատանքային մթնոլորտում: Շուրջ մեկուկես ժամ տևած բանավեճն ավարտվեց թեկնածուների ձեռքսեղմումով:  

Արա Զոհրաբյանը համոզմունք հայտնեց, որ Փաստաբանների պալատի նախագահի ընտրությունները օրինակ կծառայեն, թե ինչպես է պետք կազմակերպել ու անցկացնել քաղաքակիրթ ընտրությունները: Թեկնածուն սա ընդգծեց՝ հաշվի առնելով, որ  «մեր հասարակության մոտ համապետական ընտրությունների նկատմամբ վստահություն չկա»: 

Նշվեց, որ մարզերի փաստաբանները կտրված են Փաստաբանների պալատից, նրանք և Երևանի փաստաբանները գտնվում են անհավասար պայմաններում, սակայն վճարում են երևանյան փաստաբանների հետ նույնչափ անդամավճար՝ 5000 դրամ: Ա.Զոհրաբյանը տեսակետ հայտնեց, որ մարզերի  փաստաբանների վիճակը բարելավելու որոշակի բարեփոխումների անցկացնելու անհրաժեշտություն կա: 

Բանավեճին ներկա որոշ փաստաբանների մոտ կասկած էր հարուցում  թեկնածու Կրոմվել Գրիգորյանի ծրագրային դրույթը  փաստաբանության զարգացմանն աջակցող հիմնադրամ ստեղծելու մասին՝ ինչ միջոցներից, առավել ևս  կարճ ժամանակահատվածում պետք է ստեղծվի հիմնադրամը:  Կ.Գրիգորյանը նշեց, որ հիմնադրամի միջոցները կուտակվելու են կամավոր հիմունքներով.«Այդ նախաձեռնությունը սկսվել է իմ կողմից, երբ Ռուբեն Սահակյանն ընտրվել է Պալատի նախագահ, մի քանի անգամ 100-ական դոլար ես տվել եմ իրեն՝ Պալատի խնդիրների լուծմանն ուղղելու նպատակով: Ես համոզված եմ,  իմ օրինակին կհետևեն բազմաթիվ փաստաբաններ, ովքեր  հնարավորություն  կունենան»,- ասաց Կ.Գրիգորյանը: 

«Ի՞նչ է արվելու միջնորդ փաստաբաններ երևույթը արմատախիլ անելու համար» հարցին  ի պատասխան Կ.Գրիգորյանը տեսակետ հայտնեց, որ «այդ անձանց պատժելու համար ապացույցներ են պետք՝ ասեկոսեներով մենք չենք կարող վարույթ հարուցել: Եթե մեկ-երկուսը պատժվեն, համոզված եմ, որ միջնորդավորված գործունեությունը արմատախիլ կարվի»: Ըստ Արա Զոհրաբյանի, առաջին քայլը, որ արվում է Պալատում սկսնակ փաստաբաններին արտոնագիր տալու ժամանակ «մենք պարտադիր հորդորում ենք մեր գործընկերներին, որ այդպիսի ճանապարհով գնալ շատ բացասական կարող է անդրադառնալ՝ ընդ որում, փորձում ենք  բացատրել դրա հնարավոր իրավական ու բարոյական հետևանքները»: Միջնորդ փաստաբաններին բացահայտելու մի քանի թակարդներ  կան նաև Փաստաբանի վարքագծի կանոնագրքում:

ՓՊ յուրայինների ու օտարների բաժանված լինելու վերաբերյալ Կ.Գրիգորյանի հայտնած դիրքորոշման վերաբերյալ Ա. Զոհրաբյանը հիշեցրեց, որ իր  նախընտրական կարգախոսն  է՝  «Մեր ուժը մեր միասնության մեջ է»: «Ես բոլորի ներկայությամբ կարող եմ խոստանալ, որ այդպիսի երևույթներ չեն լինելու, եթե կան այդպիսի երևույթներ կամ դրա վերաբերյալ տպավորություն, իմ ընտրվելու դեպքում չեն լինի,  չընտրվելու դեպքում էլ գործընկերների հետ թույլ չենք տալու, որպեսզի որևիցե մեկը բաժանի  փաստաբաններին  յուրայինների ու օտարների»,- ասաց  թեկնածուն: 

Երկու թեկնածուներն էլ  դրական գնահատեցին նախընտրական քարոզարշավը: Իսկ Ա.Զոհրաբյանը հավելեց, որ քարոզարշավում ինտրիգ կար՝ թեկնածուներից մեկի օգնությամբ: Անտեսելով  անձնական վիրավորանքները՝ Ա.Զոհրաբյանը գտնում է, որ ինտրիգն ու քննադատությունն  ավելի գրավիչ դարձրեցին  ու խթանեցին  մրցակցությունը:   

Վաղը փաստաբանների մոտ լռության օր է, իսկ  սեպտեմբերի 14-ին փաստաբանները կընտրեն իրենց նոր ղեկավարին: