Փաստ ինֆո

Թերթը հարցազրույց  է ունեցել ԱԺ պատգամավոր, պաշտպանության, ԱԱ և ՆԳ հարցերի հանձնաժողովի նախագահ Կորյուն Նահապետյանի հետ՝ շեշտելով նաև, որ նա Սամվել Ալեքսանյանի քրոջ փեսան է: Թղթակիցը պատգամավորի հետ մասնավորապես զրուցել է Փակ շուկայի շինարարության և Սուրեն Խաչատրյանի տղայի ազատ արձակման հարցերի շուրջ:

Խոսելով Փակ շուկայի մասին՝ Կ.Նահապետյանը նշել է, որ տեսել է, որ բավականին դրական տեղաշարժ կա այդ տարածքում և հարակից տարածքի բնակիչները առանձին հավաքների ժամանակ հրապարակավ հայտնել են այդ մասին:

Թղթակցի այն դիտարկմանը, որ մարդիկ տեսնում են, որ հուշարձանը քանդվում է, իսկ Կ.Նահապետյանը դա դրական տեղաշարժ է տեսնում, պատգամավորն ասել է.

«Դուք միայն տեսնում եք մարդկանց մի խումբ, բայց չեք տեսնում մարդկանց այն խումբը, ովքեր տեսնում են այդ դրական տեղաշարժը: Ուղղակի պետք է հավասարապես տեսնել նաև երկրորդ տեսակետի կողմանկիցներին»:

Շարունակելով թեման պատգամավորը հավելել է.

«Դուք ասում եք՝ խախտում կա, ես էլ ասում եմ՝ եթե խախտում կա, ապա պետք է օրենքով որոշակի հետևանքներ լինեն, բայց Դուք չէ որ որոշում եք՝ խախտում կա՞, թե՞ ոչ, կամ մի քանի տասնյակ քաղաքացիներ չեն, որ որոշում են»:

Անդրադառնալով Տիգրան Խաչատրյանին ազատ արձակելու թեմային, թղթակիցը հարցրել է Կ.Նահապետյանին, թե ԱԺ պաշտպանության հարցերի հանձնաժողովի նախագահը կատարվածն ինչպես է գնահատում: Ի պատասխան՝ Կ.Նահապետյանը նշել է.

«Հարուցված քրեական գործ կա, իրականացվել է նախաքննություն և այս փուլում որոշվել է երկու  անձանց կալանքից ազատել: Ո՞վ կարող է գնահատական տալ՝ ճի՞շտ է վարվել համապատասխան մարմինը, թե՞ ոչ»:

Իսկ թղթակցի այն հարցին, թե արդյոք պատգամավորը գիտի այնպիսի մի դեպք, երբ քաղաքացին ինքնապաշտպանության համար սպանություն կատարի և ազատ արձակվի կալանքից, Կ.Նահապետյանը պատասխանել է.

«Նման դեպքի ես ականատես չեմ եղել, բայց չպետք է բացառեմ, որ կարող են նման իրավիճակներ լինել»:

Հոդվածն ամբողջությամբ կարող եք կարդալ «Ժամանակ» օրաթերթի՝ 12.09.13թ. համարում: