Փաստ ինֆո

2014թ. հունվարի 1-ից նախատեսվում է նոր աշխատավարձերի համակարգ, ամբողջ պետական համակարգը կվարձատրվի մեկ համակարգով, կլինի աշխատավարձերի բարձրացում, նվազագույն աշխատավարձը կդառնա 50 000 դրամ, ներկայիս 45 000 դիմաց, իսկ առավելագույնը մոտ 20 անգամ ավելի, քան նվազագույնը: Այսօր Կենսաթոշակային բարեփոխումների իրականացման ծրագրի մեկնարկից առաջ լրագրողների հետ հանդիպմանն ասաց ԱԺ Սոցիալական հարցերի մշտական հանձնաժողովի նախագահ Հակոբ Հակոբյանը:

Նոր համակարգով, եթե նվազագույն աշխատավարձը բարձրացվում է, ապա մյուսները պարտադրված պետք է ևս բարձրացնեն աշխատավարձերը: 

Ինչ վերաբերում է մասնավորին, ապա Հակոբյանը նշեց, որ այն չկարգավորվող շուկա է և երբ պետական հիմնարկներում աշխատողների աշխատավարձը բարձրացվի, ապա  մասնավորը  ինքնաբերաբար կբարձրացնի:

Հակոբյանի խոսքով,   մասնավոր գործատուն չի ցանկանում կադրեր բաց թողնել, իսկ պետությունն էլ ոչ միշտ է հնարավորություն ունենում լավ մասնագետներին պահելու: Նա նաև նշեց, որ պետական համակարգից կադրերի արտահոսք կա դեպի մասնավորը, բայց մասնավորից  դեպի պետականը չկա:

Պարտադիր կուտակային համակարգին անցնելն էլ, Հակոբյանը պարզաբանում է այսպես, պետությունը այսօր քաղաքացուն գումար է տալիս վաղվա համար, «մեր ամբողջ նպատակն այն է,  որ կենսաթոշակառուի գրպանը լիքը լինի»: 

Հարցին, թե քաղաքացիները որքանով կարող են վստահ լինել, որ այդ գումարները կստանան՝  Հակոբյանը  նշեց, որ որոշ երկրներ  ճգնաժամի ժամանակ հրաժարվել են այդ գումարը տալ կենսաթոշակառուներին, սակայն դրանք փոխանցվել են պետության բյուջե։ «Այնպես որ այդ գումարները չեն կորի»,- ասաց ԱԺ սոցիալական հարցերի մշտական հանձնաժողովի նախագահը: