Փաստ ինֆո

Սուրիկ Խաչատրյանի ինքնաշեն զենքը ապօրինի չճանաչելու մասին գործով մեղադրյալ Արտակ Բուդաղյանի պաշտպան Հայկ Ալումյանի դիտարկման վերաբերյալ Ա.Հարությունյանը նշեց, որ ինքնաշեն լինելը դեռևս հիմք չէ զենքն ապօրինի զենք գնահատելու համար՝ տվյալ դեպքում առկա է ՀՀ ոստիկանապետի հրամանը զենք կրելու թույլտվության մասին, ուստի այն օրինական զենք է:   

Բացի այդ, ՊՆ քննչական ծառայության պետն ընդգծեց, որ հիշյալ զենքից դեպքի օրը չի կրակվել. դատաձգաբանական, դատաքիմիական ու դատահետքաբանական համալիր փորձաքննությամբ հիմնավորվել է, որ դեպքի վայրում գործածվել է երեք զենք՝ ՄՌ 161 Կ տեսակի Տիգրան Խաչատրյանի     հրացանից արձակվել է  5, Զարզանդ Նիկողոսյանի Բռաունինգ տեսակի ատրճանակից՝ 6, Ավետիք Բուդաղյանի Պ.Բերետտա տեսակի  ատրճանակից՝  2 գնդակ: Նախաքննությամբ չեն հիմնավորվում պնդումները  Զ.Նիկողոսյանի կողմից Ավետիք Բուդաղյանին ծեծի  ենթարկելու մասին: Հակառակը, դատաբժշկական փորձաքննությամբ փաստվել  է, որ Ավետիք Բուդաղյանի մարմնին հրազենային վնասվածքներից բացի որևէ  այլ բնույթի վնասվածք առկա չէ:   

Ա.Հարությունյանը հերքեց նաև պնդումները, թե  Արտակ ու Ավետիք Բուդաղյանների վրա կրակվել է թիկունքից: Դատաբժշկական,  դատաձգաբանական, և դատաքիմիական համալիր փորձաքննությունների եզրակացություններով ու այլ ապացույցներով հիմնավորվել է, որ  Բուդաղյանների մամինների վրա առկա մարմնական վնասվածքները թիկունքից չեն հասցվել: Արտակ Բուդաղյանի մեկ և Ավետիք Բուդաղյանի 4 վնասվածքից  3-ը պատճառվել են Տ. Խաչատրյանից կողմից գործածվող  հրացանից, իսկ Ավետիք Բուդաղյանի մեկ վնասվածքը՝  Զարզանդ Նիկողոսյանի կողմից  գործածվող  Բռաունինգից: 

Գործի տվյալներով, ըստ քննչական ծառայության ղեկավարի,   հերքվում է նաև  «վերևից» կրակելու  վարկածը՝   այդ հատվածում շենքը պատշգամբ չունի, այն միհարկանի է: Իսկ կնոջ կողմից Սուրիկ Խաչատրյանին հանդիմանելու մասին պնդումները  հերքվում են  Ս.Խաչատրյանի կնոջ՝ Լորետա  Բարսեղյանի   ցուցմունքներով, ըստ որի դեռ մինչև դեպքը սկսվելը իր ամուսինը քնած է եղել և դեպքի մասին չի իմացել, ուստի ինչու պետք է ինքը դիմեր  քնած ու անտեղյակ ամուսնուն: 

Համացանցում և գործում առկա տեսանյութերը բովանդակային առումով նույնն են, նշեց Ա.Հարությունյանը, տարբերությունը ժամանակային տևողության մեջ է: Նշվեց, որ  մինչև Ս.Խաչատրյանին պատկանող տեսագրող սարքերի առգրավումը տեսաերիզի չի կարող համարվել նախաքննության գաղտնիք:    

Ի պատասխան լրագրողի հարցի՝  Ա.Հարությունյանը նշեց, որ զինդատախազին կաշառք տալու  մասին մամուլի հրապարակման մեջ նշվող հանգամանքները ստուգվում են, որպեսզի հետագայում լուծվի քրեական գործ հարուցելու կամ հարուցումը մերժելու  հարցը:

Լուսանկարը՝ news.am-ի