Փաստ ինֆո

Հայաստանի բազկամարտիկները երկուական ոսկե, արծաթե և բրոնզե մեդալ են նվաճել Լեհաստանի Գդինյա քաղաքում կայացած պատանիների, երիտասարդների և մեծահասակների աշխարհի 35-րդ առաջնությունում, որին մասնակցեց ռեկորդային՝ 48 երկրի ներկայացուցիչ:

Մեր երկրից մրցավայր էր մեկնել 8 մարզիկ, որոնցից միայն չորսը կանգնեցին պատվո պատվանդանին: Գլխավոր մրցաշարում՝ մեծահասակների պայքարում իրեն հավասարը չունեցավ երևանցի Վլադիմիր Մնացականյանը, որը աշխարհի չեմպիոն դարձավ ձախ ձեռքով պայքարողների մինչև 80 կգ քաշային կարգում: Ընդ որում, եզրափակիչ մենամարտում, ինչպես պատմեց Հայաստանի բազկամարտի ֆեդերացիայի նախագահ Արսեն Գաբրիելյանը, պարտության մատնեց ադրբեջանցի մրցակցին: Ավելորդ չէ նշել, որ Վլադիմիրը համաշխարհային ստուգատեսի հաղթող էր դարձել նաև անցյալ տարի, բայց մինչև 75 կգ քաշային կարգում:

Վճռական պայքարում Ադրբեջանի պատվիրակին հաղթեց և մեր երկրին երկրորդ ոսկե մեդալը բերեց երևանցի մեկ այլ մարզիկ Աշոտ Ադամյանը (60 կգ), որը արդեն երիտասարդների հաշվարկում նույնպես դրսևորեց ձախ ձեռքի ուժը: Նույն մարզիկը աջլիկների պայքարում ճանաչվեց 2-րդը: Երկու մեդալով վերադարձավ նաև մինչև 18 տարեկան պատանիների առաջնության մասնակից, իջևանցի Դավիթ Ստեփանյանը (65 կգ), որը ձախ ձեռքով մրցումներում զբաղեցրեց 2-րդ, իսկ աջով՝ 3-րդ հորիզոնականը: Բրոնզե մրցանակակիր դարձավ նաև մյուս իջևանցի Արմեն Չապուխյանը (100 կգ): Փորձառու բազկամարտիկը մասնակցեց մեծահասակների ձախ ձեռքով մրցումներին: 

Հավելենք, որ այս տարվա Եվրոպայի առաջնությունում մերոնք նվաճել էին տարբեր արժողության 11 մեդալ: