Փաստ ինֆո

ԱՄՆ ՄԶԳ Կենսաթոշակային բարեփոխումների իրականացման ծրագրի մեկնարկն այսօր ազդարարվեց, սակայն մինչ այժմ ծրագրին կամավոր դեռ ոչ ոք չի միացել: Ծրագրի մեկնարկին լրագրողների հետ հանդիպմանն ասաց  ԱԺ Սոցիալական հարցերի մշտական հանձնաժողովի նախագահ Հակոբ Հակոբյանը հավելելով, որ հայի հոգեբանությունն է այդպիսին,  այսօր ծախսի վաղը ինչ կլինի, կլինի: Հարցին, իսկ թե ինչու պատգամավորները չեն միացել ծրագրին`  օրինակ ծառայելով մեր համաքաղաքացիներին, Հակոբյանը նկատեց, որ ինքն էլ մեզ բոլորիս նման հայ է:

Վերջինս նաև նշում է, որ մարդը կամավոր չի գնա խնայողության, նրան պետք է պարտադրել:

Բացման խոսքում ՀՀ աշխատանքի և սոցիալական հարցերի նախարար Արտեմ Ասատրյանը շնորհավորեց ծրագրի մեկնարկի առթիվ և նշեց, որ  շարունակելով նախորդ ծրագրերի արդեն իսկ արձանագրած արդյունքները, վստահ է, որ թույլ է տալու նոր իրողությունների ներքո ձևավորել կենսաթոշակային բազմաստիճան համակարգի ամբողջական ենթակառուցվածքը, ապահովել կարողությունների շարունակական հզորացումը:

«Նոր կենսաթոշակային համակարգը,  որը ներդրվելու է 2014թ. հունվարից նոր խնդիր  է առաջադրում մեզ համար և այդ առումով արդեն իսկ 3-4 տարի իրականացված նախապատրաստական աշխատանքներ են իրականացվել և արդեն իսկ հասնում ենք գործնական կիրառմանը»,- ասաց Նախարարը, հավելելով, որ ձևավորվել է նոր համակարգ, որը թույլ է տալիս  լիարժեք տիրապետել 500 000 կենսաթոշակառուների տվյալների:

ԱՄՆ ՄԶԳ հայաստանյան առաքելության ղեկավար Քերըն Հիլլարդն էլ իր հերթին նշեց, որ USAID-ի աջակցությամբ Հայաստանի կառավարությունը շարունակում է բարելավել սոցիալական ապահովության համակարգի արդյունավետությունը և կայունությունը: Բարեփոխումները հաջողությամբ իրականացնելու նպատակով USAID-ին 4 տարվա ընթացքում կներդնի ավելի քանի 3 800 000 դոլար՝ վերապատրաստելու Աշխատանքի և սոցիալական հարցերի նախարարության մասնագետներին և հզորացնելու նախարարության ինստիտուցիոնալ կարողությունները:

Միևնույն ժամանակ  USAID-ը կաջակցի բարելավել նախարարության տեղեկատվական տեխնոլոգիաների համակարգը և ավելի լավ ծառայությունները տրամադրել թոշակառուներին:

Համագործակցություն կլինի նաև Ֆինանսների նախարարության և Կենտրոնական բանկի  հետ՝ կենսաթոշակային համակարգի ֆինանսական կայունությունը ապահովվելու նպատակով:

«Եվ քանի որ Հայաստանի կառավարությունը ակնկալում է, որ աշխատողները կենսաթոշակային ֆոնդին տրամադրեն իրենց աշխատավարձի մի մասը, ապա կառավարությունը պատասխանատու է  այդ ֆոնդերի խելացի կառավարման համար: Այդ իսկ պատճառով անհրաժեշտ է վստահություն ձևավորել քաղաքացիների շրջանում հանրային իրազեկման քարոզարշավի միջոցով»,- ընդգծեց Քերըն Հիլլարդը :

Վերջինս նաև հույս հատնեց, որ կենսաթոշակային բարեփոխումները հաջողությամբ կիրականացվեն: