Փաստ ինֆո

Հունիսի 1-ին  Սյունիքի նախկին մարզպետ Սուրիկ Խաչատրյանի առանձնատան մոտ կրակոցների գործով մեղադրյալ Արտակ Բուդաղյանի պաշտպան Հայկ Ալումյանը ապատեղեկացնում է հանրությանը, իսկ մամուլն էլ՝ բացառությամբ մի քանի լրատվամիջոցների, չի  խորանում  փաստերի մեջ:  Այս մասին այսօրվա ասուլիսում հայտարարեց  Ս.Խաչատրյանի  որդու՝ Տիգրան Խաչատրյանի  պաշտպան Ռուբեն Սահակյանը: Հայկ Ալումյանը, նրա գնահատմամբ,  պաշտպանությունը կառուցում է քննության սխալների, ճշմարտությունն ու ոչ ճշմարտությունը մեկտեղելու վրա: 

Մասնավորապես, պաշտպանը անդրադարձավ  Հ.Ալումյանի հայտարարություններին, թե  Տ.Խաչատրանը Ավետիք ու Արտակ Բուդաղյանների վրա կրակել է թիկունքից և  թե կրակել են «վերևից», դա չի համապատասխանում գործի քննությամբ ձեռք բերված տվյալներին, մասնավորապես,  տեսաձայնագրման ժապավենին: Ի դեպ, Ռ.Սահակյանը հերքեց  Հ.Ալումյանի պնդումը, թե ժապավենը մոնտաժված է՝ կա մոնտաժված ու ոչ մոնտաժված ժապավեն:   Պաշտպանը հերքեց նաև իր պաշտպանյալի ընդդիմախոս փաստաբանի պնդումը, թե Տ.Խաչատրյանի զենքը   ապօրինի զենք է՝  այն պաշտպանության նախարարի հրամանով նվիրվել է  Սուրիկ Խաչատրյանին: Ռ.Սահակյանը հակադարձեց նաև Հ.Ալումյանի  հայտարարությունն առ այն, որ  Ա.Բուդաղյանի զենքի մեջ գնդակներ չկային՝ որտեղի՞ց պետք է   Տ.Խաչատրյանը իմանար այդ մասին: 

Ռուբեն Սահակյանն ընդգծեց, որ  հանրության հակազդեցությունը պայմանավորված է նախկին մարզպետի հանդեպ ատելությամբ: Նա միաժամանակ հիշեցրեց, որ ինքը ոչ թե Ս.Խաչատրյանի, այլ նրա որդու պաշտպանն է: Իսկ իր պաշտպանյալը գործել  է  անհրաժեշտ պաշտպանությունից ելնելով՝  պաշտպանել է իր տունն ու ընտանիքը, այդ թվում՝ իր մորը:

Պաշտպանը հայտարարեց, որ  իր միջնորդության հիման վրա իր պաշտպանյալի նկատմամբ քրեական հետապնդումը դադարեցնելու որոշումը ցույց տվեց, որ վերջապես արդարադատությունը Հայաստանում գտնվեց իր բարձրության վրա՝   նրան  ճաղերի հետևում  պահելու որևէ հիմք չկար: 

Ռ.Սահակյանը նորից  հրավիրեց  Հ.Ալումյանին՝ մասնակցել իր հետ  բանավեճի՝  իրավաբան գիտնականների մասնակցությամբ: