Փաստ ինֆո

 

Քրեակատարողական  ծառայությունը շարունակում է մնալ  արդարադատության  նախարարության կարգավորման ոլորտներից ամենախոցելին: ՀՀ արդարադատության նախարար  Հրայր Թովմասյանն այսօրվա ասուլիսում նշեց, որ  այս պահի դրությամբ թեպետ գերբնակեցումը մեղմացված է, սակայն  խնդիրը լուծված չէ՝  հիմնականում  փակ ռեժիմի քրեակատարողական հիմնարկներում, որտեղ առկա են կալանավայրերի  գերբնակեցման, ենթակառուցվածքների, կադրերի, այլ սուբյեկտիվ գործոնների խնդիրներ: Նախարարն ընդգծեց, որ  ՔԿ համակարգը մարդուն պատժելու, ուղղվելու հնարավորություն տալու և  որպես  լիարժեք մարդ հասարակություն վերադարձնելու իր գործառույթը լիարժեք չի իրականացնում: 

 

Նախարարը հույս հայտնեց, որ եկող տարի իր գործունեությունը կսկսի պրոբացիոն ծառայությունը, ինչը կնպաստի նախնական կալանքների թվի էապես նվազելուն:   

 

Հ.Թովմասյանը նշեց նաև, որ ամենաուշը հաջորդ տարվա առաջին եռամսյակում կսկսի գործել  «Արմավիր» ՔԿՀ   400-տեղանոց առաջին մասնաշենքը: Նա տեղեկացրեց, որ ԵՄ «Աջակցություն բյուջեին» ծրագրով 8 մլն եվրո գումար է նախատեսված  մինչև 2016թ.1200-տեղանոց եվրոպական չափանիշներին համապատասպանող ՔԿՀ ունենալու համար: Դա նշանակում է, որ որոշակիորեն պետք է արագացվեն «Արմավիր» ՔԿՀ-ի շինարարության  տեմպերը: Հեռանկարում Հայաստանը ներկայումս գործող 12 ՔԿՀ-ների փոխարեն  կունենա 5-6 ՔԿՀ, ինչն ինքնին կլուծի ռեսուրսների ոչ նպատակային ծախսման  և կադրերի ոչ արդյունավետ օգտագործման խնդիրը: 

 

Նոտարիատի և Քաղաքացիական կացության ակտերի գրանցման ծառայությունների ոլորտում, նախարարի գնահատմամբ, կան ձեռբերումներ, որոշակի կարգուկանոն հաստատված է, բայց դրանք բավարար չեն խնդիրները լուծելու համար:  Այս տարվա ընթացքում մինչև եկող տարվա սկզբները կգործարկվի էլեկտրոնային նոտարիատի համակարգը: Քաղաքացիական կացության ակտերի բոլոր արխիվների թվայնացման պրոցեսն ընթանում է՝ մոտ 10 մլն փաստաթղթի մասին է խոսքը: «Մենք հուսով ենք, որ մեկ- երկու տարվա ընթացքում վերջին 20-30 տարվա այդ թվային արխիվները կկարողանանք թվայնացնել, ինչը նույնպես կնպաստի էլեկտրոնային կառավարման համակարգի կամ մեկ պատուհանի միջոցով ծառայություններ մատուցելուն»,- ասաց նախարարը: Եկող տարվա ընթացքում առնվազն 10 մարզկենտրոններում կգործարկվեն  ռեգիստրի, կադաստրի, անձնագրային, քաղաքացիական կացության ակտերի գրանցման, էլեկտրոնային ստորագրության ծառայություններ մատուցելու գործընթացը՝  մեկ պատուհանի միջոցով: 2015թ. վերջում մեկ պատուհանի սկզբունքը կտարածվի ամբողջ երկրում:  

 

Դրական տեղաշարժ կա  նաև դատական ակտերի հարկադիր կատարման ոլորտում՝  կրճատվում են դատական ակտերի կատարման  ժամկետները: «Գանձվող գումարների տոկոսային թվերը ըստ էության ընդլայնվում են, սա արձանագրել է նաև Համաշխարհային բանկը»,- ասաց Հ.Թովմասյանը: