Փաստ ինֆո

Այն, որ Արարատյան դաշտի անկանոն ջրօգտագործման, և հատկապես այստեղ գործող ձկնաբուծարանների հետևանքով այդ տարածքը բնապահպանական աղետի առջև է կանգնած, պարզվում է ոչ միայն բնապահպաններն են ահազանգում, այլև կառավարությունում են գիտակցում:

Ընդ որում, ոչ թե նոր, այլ դեռևս 2 տարի առաջ: Պարզվում է դեռ 2011թ.-ին ՀՀ Վարչապետը Արարատյան դաշտի ստորերկրյա ջրային պաշարների օգտագործման հիմնախնդիրների լուծմանը վերաբերող գաղտնի հանձնարարական է տվել:

Թե պետական որ մարմիններին է ուղղված եղել այն և թե ինչ բովանդակություն է ունեցել, պարզել հնարավոր չէ, քանի որ այն գաղտնի է պահվում հասարակությունից:

Բայց այսօր կառավարությունը մեկ այլ որոշում է կայացրել, որն, ինչպես նշված է նախագծում բխում է հենց այդ գաղտնի հանձնարարականից:

Եվ այսպես, ոլորտի օրենսդրության մեջ մի շարք փոփոխություններ իրականացնելով, կառավարությունը որոշել է բարձրացնել ջրօգտագործման դիմաց գանձվող բնօգտագործման վճարները:

Ավելորդ չէ նշել նաև, որ այս խստացումները վերաբերում են հատկապես այս մարզերում գործող բազմաթիվ ձկնաբուծարաններին, որոնց սեփականատերերի շարքում, ըստ մամուլի, կան նաև ազդեցիկ գործարարներ ու պետական պաշտոնյաներ:

Օրինակ, Արարատի և Արմավիրի մարզերում, որտեղ վիճակն ամենաաղետալին է, որոշվել ձկնաբուծության նպատակով օգտագործված ստորերկրյա ջրի դիմաց  բնօգտագործման վճարը այսուհետ հաշվարկել արդյունահանված ջրի ծավալի 50 %-ի չափով: Նշենք, որ մինչ այժմ նրանք վճարում էին օգտագործած ջրի միայն 5 %-ի համար:

Իսկ ապօրինի ջուր գողացողներն այսուհետ նախկին եռապատիկի փոխարեն  կտուգանվեն Արարատի և Արմավիրի մարզերում` տասնապատիկի, մյուս մարզերում` հնգապատիկի չափով: 

Նախագծի հեղինակները վստահ են, որ այս խստացումները կհանգեցնեն Արարատյան ջրավազանում ջրօգտագործման ծավալների նվազեցմանը, ինչը կնպաստի բնապահպանական բարդ իրավիճակի բարելավմանն ու ջրային ռեսուրսների կայուն օգտագործմանը: 

Հեղինակ` Նելլի Դանիելյան