Փաստ ինֆո

ՀՀ քաղաքացիական վերաքննիչ դատարանը՝ դատավոր Դանիել  Խաչատրյանի նախագահությամբ, այսօր մերժեց «Պահանջում ենք պատժել «Հարսնաքարում» տեղի ունեցածի բոլոր մեղավորներին» հասարակական շարժման նախաձեռնող խմբի ակտիվիստ  Դավիթ Սանասարյանի բողոքը: 

Դատարանն այսպիսով ուժի մեջ թողեց   Երևանի Ավան և Նոր Նորք վարչական շրջանների ընդհանուր իրավասության դատարանի՝  դատավոր  Էդուարդ Ամալյանի նախագահությամբ,  կայացրած հունիսի 13-ի վճիռը  Դավիթ Սանասարյանն  ընդդեմ Ռուբեն Հայրապետյանի` բարի համբավին, պատվին, արժանապատվությանը և գործարար համբավին պատճառված վնասի հատուցման պահանջի մասին հայցադիմումի գործով:

Ըստ հայցվորի ու նրա ներկայացուցչի, Ռուբեն Հայրապետյանը 2012 թվականի օգոստոսի 11-ին «Նուվել դ’Արմենի Մագազին» ամսագրին տրված հարցազրույցում անվայելուչ վիրավորանքներ և զրպարտող, իրականությանը չհամչապատասխանող արտահայտություններ և սպառնալիքներ է հնչեցրել հայցվորի հասցեին` արատավորելով նրա բարի համբավը, արժանապատվությունը, պատիվն ու գործարար համբավը: Հայվոր կողմը  դատարանից խնդրել էր  պարտավորեցնել պատասխանողին հրապարակայնորեն ներողություն խնդրել Դավիթ Սանասարյանից` նրա հասցեին հնչեցրած վիրավորական արտահայտությունների համար և հերքել նրա բարի համբավը, պատիվը, արժանապատվությունը և գործարար համբավն արատավորող տեղեկությունները, փոխհատուցել նրա կողմից կատարված դատական ծախսերը:

Պատասխանողի ներկայացուցիչը 10.12.2012թ-ին դատարան ներկայացրած հայցադիմումի պատասխանով ամբողջությամբ առարկել էր  հայցադիմումի դեմ և հայտնել, որ հայցվորի ներկայացրած փաստերն էական նշանակություն չունեն սույն գործի լուծման համար` հայցային վաղեմության լրանալու հիմքով: 

Ընդհանուր իրավասության դատարանը մերժել էր Դավիթ Սանասարյանի հայցն ընդդեմ Ռուբեն Հայրապետյանի հայցային վաղեմության ժամկետը լրանալու հիմքով: