Փաստ ինֆո

Թերթը հարցազրույց է ունեցել փաստաբանների պալատի նախագահի թեկնածու, ՓՊ գործող նախագահի կողմից առաջադրված Արա Զոհրաբյանի հետ: Թեկնածուն պատասխանելով մի շարք հարցերի՝ ասել է, որ քարոզարշավը, ընդհանուր առմամբ, գնահատում է դրական:

Թղթակցի այն հարցին, թե այս ընթացքում ինչ նոր խնդիրներ են բացահայտվել, Ա.Զոհրաբյանը նշել է, որ փաստաբանների հետ զրույցում արձանագրվել է այնպիսի լուրջ խնդիր ինչպիսին անդամավճարների չափն է:

«Կարծում եմ մարզերում այն պետք է տարբերակվի Երևանից: Բոլորս էլ լավ գիտենք, որ Երևանը տնտեսական զարգացման տեսակետից ավելի կենտրոնացված է, հնարավորությունների առումով էլ ամեն ինչ կա: Իսկ մարզային փաստաբաններից ևս  պահանջել ամսական հինգ հազար դրամ, արդարացի չէ: Կարիք կա վերանայելու անդամավճարների սահմանման մոտեցումը»,- ասել է Ա.Զոհրաբյանը:

Իսկ լրագրողի այն հարցին, թե Ա.Զոհրաբյանը մյուս թեկնածուների նախընտրական ծրագրերին արդյոք  ծանոթ է և որքանով են դրանք մրցունակ, Ա.Զոհրաբյանն ասել է. «Կոնկրետ որպես ծրագիր , այսպես ասած բուկլետներ, ներկայացվում են Տիգրան Աթանեսյանի կողմից, խնդիրներ հնչեցրել է Կրոմվել Գրիգորյանը, երկու թեկնածուների կողմից ներկայացվել են տեսակետներ, մոտեցումներ: Ասեմ, որ նրանց ներկայացրած խնդիրների մեծ մասն իմ կողմից տեսանելի են, այսինքն՝ ես տեսնում եմ նրանց բարձրաձայնած խնդիրները, դրանք ներառված են իմ ծրագրի մեջ: Խնդիրը հորինովի չի լինում. Այն կամ լինում է, կամ՝ ոչ»:

Թղթակիցն անդրադարձել է նաև մրցակիցների հետ համագործակցելու թեմային: Այս կապակցությամբ Ա.Զոհրաբյանը նշել է, որ հաճելի չէ, երբ մրցակիցը սև PR տեխնոլոգիա է կիրառում, սակայն  թեկնածուն հավելել է, որ դա նրա վրա նստվածք չի թողնում. «Պատրաստ եմ նրանց հետ աշխատելու, համագործակցելու՝ անկախ ամեն ինչից»:

Միաժամանակ թեկնածուն պատասխանելով այն հարցին, թե Տիգրան Աթանեսյանի կարծիքով հիմնական մրցակցությունը նրա և Ա.Զոհրաբյանի միջև է, ասել է, որ Կրոմվել Գրիգորյանն ավելի շատ ձայներ հավաքելու հնարավորություն ունի, քան Տիգրան Աթանեսյանը: