Փաստ ինֆո

 

Դատական կարգադրիչների  գործով  արգելանքի տակ գտնվող անձինք արդեն 8-ն են, այսօր ձերբակալվել է  դատական կարգադրիչների ծառայության պետի տեղակալ Գագիկ Խաչատրյանը: Հիշեցնենք, որ մյուս տեղակալի`   Գեղամ Գրիգորյանի նկատմամբ հայտարարվել է հետախուզում: 

 

Ըստ «Փաստինֆո»-ի ունեցած տեղեկատվության,  դատական կարգադրիչների համակարգում աշխատավարձերի յուրացման դեպքեր են բացահայտվել, որն իր ընդգրկմամբ հավակնում է  դառնալ սոցիալական չարաշահումների աղմկահարույց գործերից հետո երկրորդը:   Քննությամբ բացահայտվել են մի քանի տասնյակ անձինք,  ովքեր գրանցված են եղել, սակայն չեն ներկայացել աշխատանքի, իսկ նրանց աշխատավարձերը ստացել ու յուրացրել են նրանց պետերը: Ընդ որում, չարաշահումներն ընդգրկել են տարբեր ընդհանուր իրավասության դատարանների դատական կարգադրիչների կառույցներ, իսկ «կծիկը»  գլորվում ու հասնում է մինչև դատական կարգադրիչների ծառայության կենտրոնական համակարգ: 

 

Մեղադրանքներ են առաջադրվել նաեւ դատական կարգադրիչների ծառայության տարբեր ստորաբաժանումների ղեկավարներին: 

 

Մասնավորապես մեղադրանք է առաջադրվել ՀՀ դատական դեպարտամենտի դատական կարգադրիչների ծառայության կենտրոնական մարմնի դատական կարգադրիչների ստորաբաժանման պետ Արմեն Ավագյանին` ՀՀ քրեական օրենսգրքի 178-րդ հոդվածի 3-րդ մասի առաջին կետով՝ առանձնապես խոշոր չափերի խարդախություն և  314-րդ հոդվածով՝ Պաշտոնեական կեղծիք կատարելու համար:

  

ՀՀ քրեական օրենսգրքի 178-րդ հոդվածի 3-րդ մասի առաջին կետով՝ առանձնապես խոշոր չափերի խարդախություն և  314-րդ հոդվածով մեղադրանք է առաջադրվել նաև Երևանի Ավան և Նոր Նորք վարչական շրջանների դատարանի դատական կարգադրիչների ստորաբաժանման ղեկավար Բագրատ Արիկյանին և նրա նկատմամբ խափանման միջոց է ընտրվել կալանավորումը: 

 

Իսկ Աջափնյակ ու Դավիթաշեն վարչական շրջանների ընդհանուր իրավասության դատարանի դատական կարգադրիչների ծառայության պետ Արմեն Միրզոյանին մեղադրանք է առաջադրվել  ՀՀ քրեական օրենսգրքի 308-րդ՝  Պաշտոնեական լիազորությունները չարաշահելու և 314-րդ հոդվածներով` կեղծիքի համար: Ըստ մեր ունեցած տեղեկությունների,  Արմեն Միրզոյանը մեղադրվում է նրանում, որ 2012թ-ի փետրվարի 1-ից մինչեւ 2013թ-ի հուլիս ամիսն ընկած ժամանակահատվածում Աջափնյակ և Դավիթաշեն վարչական շրջանների ընդհանուր իրավասության դատարանի դատական կարգադրիչների ծառայության ավագ դատական կարգադրիչի պաշտոնում նշանակված Հրանտ Դավթյանին չի ներգրավել ծառայության մեջ, ազատել է պարտականությունները  կատարելուց: Բայց նրա աշխատանքի չներկայանալու հանգամանքը թաքցրել է, կատատարել պաշտոնեական կեղծիք և, ներկայացնելով կեղծ տեղեկագրեր, հափշտակել նրա աշխատավարձը՝ ավելի քան 1,5 մլն   դրամ:

Մեղադրյալների թվում է նաեւ Արաբկիրի դատական կարգադրիչների պետ Սամվել Ալեքսանյանը:

 

Ի դեպ, հարկ ենք համարում նշել, որ ՀՀ ոստիկանության հասարակայնության հետ կապերի ու լրատվության  վարչությունը կայքերից մեկին  լրատվություն տրամադրելիս մոռացել է, որ   «մեղադրյալների անձնական տվյալները հանդիսանում են հրապարակման ոչ ենթակա նախնական քննության տվյալներ, ուստի «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 3-րդ կետի կարգով չեն կարող տրամադրվել»:  Մինչդեռ «Փաստինֆո»-ի հարցերին պատասխանելիս նույն դրույթը օգտագործում էր որպես վահան: Այսինքն՝ ակնհայտ է, որ ոստիկանությունը կիրառում է երկակի ստանդարտներ՝ մի դեպքում տրամադրելով անձնական  տվյալներ, իսկ մյուս դեպքում՝ տալով  զավեշտի հասնող կոդավորված պատասխաններ:  Իհարկե,  դա չի խանգարում, որ «Փաստինֆո»-ն ընթերցողներին տրամադրի լիարժեք եւ ճշգրիտ տեղեկատվություն: 

 

Նշենք, որ հարկատուների վճարած հարկերից են վճարվում պետական մարմինների աշխատողների աշխատավարձերը,  և  հարկատուներն իրավունք ունեն իմանալու, թե ինչպես են տնօրինվում իրենց  վճարած հարկերը:  Եվ ոստիկանությանը դուր է գալիս, թե ոչ, «Փաստինֆո»-ն շարունակելու է իր ուշադրության կենտրոնում պահել այս և հանրությանը հետաքրքրող այլ գործերը՝ օգտվելով իր այլ աղբյուրներից, որքան էլ ոստիկանությունը փորձի արհեստական խոչընդոտներ հարուցել: