Փաստ ինֆո

29-ամյա Երևանի բնակիչ Սամվել   Վարդանյանին առաջադրվել էր ուրիշի գույքը՝ արտասահմանյան ավտոմեքենաները,  խաբեությամբ  հափշտակելու մեղադրանք՝ դրվագները չորսն են: 

Այսպես, ամբաստանյալը  խարդախության եղանակով ուրիշի գույքի հափշտակություն կատարելու դիտավորությամբ նախապես համաձայնության գալով հոր`  Սերգեյ Վարդանյանի հետ, հայր և որդի Գևորգ  և Մովսես Մանուկյանների վստահությունը չարաշահելու եղանակով, Արթուր Սևաչերյանի տվյալներով կեղծ անձնագրով գրել են ձեռագիր համաձայնագիր`  գումարի տարաժամկետ վճարման պայմանով`  Մովսես Մանուկյանի անվամբ հաշվառված  «ԲՄՎ 300»  մակնիշի   ավտոմեքենան գնելու վերաբերյալ և 2012 թվականի ապրիլի 22-ին  Գևորգ  Մանուկյանից խաբեությամբ հափշտակել են խոշոր չափի 1.569.600 ՀՀ դրամին համարժեք 4.000 ԱՄՆ դոլար արժողության մեքենան: 

Սամվել  Վարդանյանը` խարդախության եղանակով ուրիշի գույքի հափշտակություն կատարելու դիատավորությամբ, Արմեն Վարդանյանին պատկանող և վերջինիս ընկեր Մովսես Ալեքյանի տրամադրության տակ գտնվող`  «Վոլկս Վագեն Գոլֆ 3»  մակնիշի ավտոմեքենան գնելու և հաջորդող ժամանակահատվածում գումարը մաս-մաս վճարելու պատրվակով`  չարաշահելով վերջինիս վստահությունը գրել է  գումարի տարաժամկետ վճարման վերաբերյալ ձեռագիր պարտավորագիր և   2012 թվականի հոկտեմբերի 7-ին հափշտակել Արմեն Վարդանյանին պատկանող`   խոշոր չափի 1.829.655 ՀՀ դրամին համարժեք    4.500 ԱՄՆ դոլար գումար արժողության,  ավտոմեքենան:

Մեկ այլ դրվագով     Սամվել  Վարդանյանը՝  տեղեկանալով Կոտայքի մարզի Ջրվեժ գյուղի  բնակիչ Սերժիկ  Սաֆարյանի կողմից անձնական օգտագործման`  «Վոկսֆագեն Գոլֆ» մակնիշի   ավտոմեքենան վաճառելու մասին` խարդախության եղանակով ուրիշի գույքի հափշտակություն կատարելու դիտավորությամբ,    Ս.Սաֆարյանին է ներկայացրել իր տվյալներով և լուսանկարով կեղծ անձնագրի պատճեն   և 2012թ. նոյեմբերի 27-ին   հիշյալ ավտոմեքենայի վերաբերյալ Սերժիկ   Սաֆարյանի հետ կնքել է առուվաճառքի պայմանագիր` գումարի տարաժամկետ վճարման պայմանով, և պայմանագրով նախատեսված ժամկետում ավտոմեքենայի արժեք գումարները վճարելու կեղծ խոստումով, նույն օրը ժամը 20:30-ի սահմաններում խաբեությամբ Սերժիկ Սաֆարյանից հափշտակել է խոշոր չափի 2.870.000 ՀՀ դրամ արժողության   ավտոմեքենան: 

Սամվել  Վարդանյանը 2012թ. սեպտեմբերին ինտերնետային համացանցի «List.am»  կայքում տեսնելով Արմավիրի մարզի Ապագա գյուղի բնակիչ Աշոտ  Ղազարյանի`  «Մերսեդես Բենց Տ 420»   մակնիշի  ավտոմեքենան ապառիկ կարգով վաճառելու հայտարարությունը`   յուրացման եղանակով ուրիշի գույքի հափշտակութուն կատարելու դիտավորությամբ, 2012 թվականի սեպտեմբերի 7-ին, գրել է տարաժամկետ վճարման պայմանով ձեռագիր համաձայնագիր`  հիշյալ ավտոմեքենան 3.502.170 ՀՀ դրամին համարժեք 8.500 ԱՄՆ դոլարով գնելու մասին և հաջորդող ժամանակահատվածում տիրապետել նշված ավտոմեքենան: Այնուհետև ուրիշի գույքի հափշտակության նպատակով 2012 թվականի սեպտեմբերի 13-ին ապամոնտաժելով  «Մերսեդես Բենց Տ 420» մակնիշի   ավտոմեքենայի 206.000 ՀՀ  դրամին համարժեք    500 ԱՄՆ դոլար արժողության գազի գլանանոթը, վաճառել այն ինքնությունը չպարզված անձի 100.000 ՀՀ դրամով և յուրացման եղանակով հափշտակել գազի գլանանոթի արժեքը:

Նկարագրված արարքների համար  Սամվել  Վարդանյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով՝   խոշոր չափերով խարդախություն՝ երկու դրվագով,   ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ կետերով՝   մի խումբ անձանց կողմից նախնական համաձայնությամբ խոշոր չափերով խարդախություն    և   ՀՀ քրեական օրենսգրքի 179-րդ հոդվածի 1-ին մասով՝ յուրացնելը: 

Մինչև դատաքննությունն սկսելն ամբաստանյալ Սամվել  Վարդանյանը միջնորդել է  դատական քննությունն անցկացնել արագացված կարգով՝ հայտարարելով, որ առաջադրված մեղադրանքն իրեն պարզ է, համաձայն է մեղադրանքի հետ: Մեղադրող Ա.Մկրտչյանը  և  տուժողներ`  Գ.Մանուկյանը Ս.Սաֆարյանը, Ա.Վարդանյանը  չեն առարկել  արագացված դատական քննության կարգ կիրառելու դեմ, և դատարանը որոշել է  դատական քննությունն անցկացնել արագացված կարգով:

Երևանի Ավան և Նոր Նորք վարչական շրջանների ընդհանուր իրավասության առաջին ատյանի դատարանը` նախագահությամբ դատավոր Ա.Վարդապետյանի, օգոստոսի 20-ի դատավճռով Սամվել Վարդանյանին մեղավոր  է  ճանաչել երկու դրվագներով  ՀՀ  քրեական օրենսգրքի 178-րդ հոդվածի 2-րդ մասի 2-րդ կետով, ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ կետերով և ՀՀ քրեական օրենսգրքի 179-րդ հոդվածի 1-ին մասով: Պատիժները մասնակիորեն գումարելու միջոցով Սամվել  Վարդանյանի նկատմամբ վերջնական պատիժ է  սահմանվել ազատազրկում 6 տարի 6   ամիս ժամկետով: Դատարանը դատավճռով բավարարել է տուժող Սերժիկ  Սաֆարյանի քաղաքացիական հայցը Սամվել Վարդանյանից հօգուտ տուժողի  որպես հանցագործությամբ պատճառված վնասի հատուցում 2.870.000 ՀՀ դրամ  բռնագանձելու մասին: Դատարանը բավարարել է նաև տուժողներ Գևորգ  Մանուկյանի և Արմեն Վարդանյանի քաղաքացիական հայցերը՝ Սամվել Վարդանյանից համապատասխանաբար 1.569.000 ՀՀ դրամ և 1.700.00 ՀՀ դրամ բռնագանձելու մասին: Իսկ տուժող Աշոտ Ղազարյանին քաղաքացիական դատավարության կարգով քաղաքացիական հայց ներկայացնելու իրավունք է  վերապահվել:

Պատիժ նշանակելիս դատարանը հաշվի է առել, որ ամբաստանյալն իրեն լիովին մեղավոր է ճանաչել, անկեղծորեն զղջացել է կատարածի համար:  Դատարանը հաշվի է առել նաև հանցագործությունների վտանգավոր ռեցիդիվը՝ ամբաստանյալը նախկինում երկու անգամ դատապարտված է եղել: